經紀行同證監會周不時就監管問題有爭拗，鬧上法庭亦時有出現，不過近日入稟高院嘅福廣證券前交易董事易明結，就向法院提出一個特別嘅要求，佢指喺04年起訴證監嘅一項索償訴訟中，證監外聘法律顧問高偉紳律師行同佢打官司，易明結認為，證監外聘律師，肯定導致堂費「驚惶失色」，係蓄意令起訴人可能要支付天文數字嘅堂費，並唔公平，而且有違法例賦予證監的職責，因此要求法院頒令，證監即時撤回外聘律師，用番證監內部法律服務部嘅律師同佢鍊過。
呢單案可能有排玩，但另一單就有結果，證監噚日公開譴責信誠證券及公司負責人劉升昂，並分別罰款9.5萬元及4.5萬元。證監指一名喺信誠開戶嘅投資者就未經授權嘅交易作出投訴，但信誠冇保存該投資者嘅落盤電話錄音。信誠原本向證券及期貨事務上訴審裁處上訴，但就被駁回，最後都要被罰。