本月三十日森美會以隊長身份參與「adidas梁漢文+10大戰森美+10」足球賽，為了迎戰梁漢文（Edmond），森美最近常練波，希望在比賽中小勝對方，因為他覺得足球比賽以小比數勝出是最緊湊的。森美日前說：「一直以嚟我覺得三比二係最好嘅比數，因為九十分鐘之內有五個入球係最緊湊嘅，同埋到時我都唔想大比數贏Edmond啦，要佢輸得太肉酸就唔好啦。」
摸黑踢波
在眾多足球國家隊中，森美最愛阿根廷。至於一眾球星中，森美覺得萬人迷碧咸（DavidBeckham）最全面，他笑言自己與碧咸有共通點，都是怕老婆的人，森美笑說：「我一路觀察到碧咸個樣同我一樣，係眉粗同埋眉同眼之間嘅距離好近，我知道呢啲相嘅男人都係好怕老婆嘅，加上我懷疑佢身邊個辣妹係好惡嗰啲女人。」
此外，森美談及讀書時踢波的趣事，他記得當年讀寄宿學校，與同學在早上六時拿着電筒摸黑踢波，他說：「六點鐘天未光我哋成班就去踢波，但係咁黑就睇唔到個波，於是人人都拎住電筒，個龍門就會放兩個電筒喺地下。」
採訪、攝影：李珮洳