惡佬明在復活節假期唔出外旅遊同人逼餐死，留番喺香港，享受清閒。復活節星期六日，一家四口遊沙田，點幾鐘巡遊到麗豪酒店，入中餐廳，吉枱處處，直行直入，與十幾年前排隊起碼半個鐘頭至一個鐘頭嘅情況完全唔同。飲茶之際，睇報紙見到廣東人「飲茶」一詞已列入英文詞彙，就係drinktea咁簡單，繼「功夫」（kungfu）之後，廣東話再度揚威英語世界，我哋廣東人drinktea與英國人之tea完全唔同性質，唔知英國人以後見到drinktea一詞，會唔會睇錯隔籬呢？
Drinktea之後，一家人行經酒店內一個樓盤示範單位。睇樓係香港人消閒好節目，唔買都睇吓，包無蝕底。點知喺門口畀一位sales（地產代理）截住：「先生貴姓？家居何處？」惡佬明窒咗一窒，望清楚一啲宣傳資料，咦，係豪宅噃，近萬蚊一呎，邊度買得起呀，唔怪得地產代理要問，心諗如果自己答住響沙田第一城或者濱景花園，唔知畀唔畀入去呢？心念一轉，隨口噏：「住響駿景園！」點知地產代理又問：「單位有幾大呀？」惡佬明幾乎唔識轉彎，老婆在旁立即講：「千六呎。」哦，地產代理先至面露笑容，放佢哋入內。
惡佬明做慣地盤，睇完對老婆講：「如果我哋真係要搬，駿景園好過呢個新樓盤多多聲喎，起碼開揚幾十倍。記唔記得呀，我家姐移民前就住喺呢個新盤對面嘅村屋，日日畀蚊咬，蚊多到防不勝防。」惡佬明做得建築耐，明白香港啲樓係用嚟炒嘅，唔係用來住嘅，總之推銷之時，用「包裝」概念，講到信者得救，咁就掂晒。甚麼落地玻璃窗，飽覽海景、馬場景，乜乜景喎，啲玻璃窗並無實用價值，你估住咗入去，無時無刻掛住睇景咩，有咗落地玻璃，擺床擺櫃嘅限制多多，兼且消耗能源，絕不環保，只有一樣好處，惡佬明話：「幫發展商慳番唔少成本。」