黎姿、蒙嘉慧、陳豪和鄭嘉穎昨日在荃灣拍攝無綫新劇《通天幹探》的一場打網球戲份。
黎姿穿上風褸攜雨傘和帽等防曬裝備到場，她表示甚少打網球，拍攝時更烏龍百出，狂食波餅，她說：「我幾年前滑雪整傷左膝韌帶，用枴杖行都用咗兩個月，醫咗半年至好番，所以𠵱家只可以跑步同做瑜伽。」黎姿自言擔心拍打戲會甩骱，故有免打金牌，但卻被笑指為傷殘。
另一女主角蒙嘉慧球技同樣水皮，幸得陳豪和嘉穎充當教練，她說：「初時都有同導演講有冇替身，因為我怕扭傷手，咁最後當然係冇替身喇，不過好彩有兩個臨時教練。」陳豪與嘉穎平時十分喜歡打網球，故昨日可說是二人的showtime，陳豪說：「我平時都會除衫打網球，可做運動之餘又可以曬太陽。」
「成副盔甲裝咁」
對於除衫打波，嘉穎亦甚表認同，因可曬得均勻膚色。問到嘉穎對於兩女的球技有何評價時，他說：「蒙嘉慧有運動底，雖然少打波但好快上手，黎姿着到成副盔甲裝咁，我覺得佢應該多做運動。」
採訪、攝影：王崇穎
