今日，孫柏文想用隻金手指為大家篤爆一個非常之合邏輯嘅「事實」。大家從一個最簡單嘅分析角度睇，如果有一隻原材料價錢飛升，咁生產嗰隻原材料嘅公司，就應該可以用比以前更高嘅價錢去賣佢哋嘅原材料，繼而可以賺多啲錢。例如，一間金礦公司，生產黃金成本係300美元一盎斯，咁如果黃金一盎斯由350美元升至500美元，間金礦公司理應可以每一盎斯黃金賺多150美元。
不過，今次黃金大升浪，就有一家原本實力非常雄厚嘅金礦公司，差啲因金價上升，搞到佢執笠。大家一定會問點解：「金價上升，搞到金礦公司執笠？」呢個唔合邏輯嘅現象，全因現代財技所賜。
專家教路
當年有間金礦公司叫做AshantiGoldfields，因為聽咗投資銀行「專家」話：「黃金這個『歷史遺物』，係現今科技發達嘅社會，邊度會有價值，啲買金嘅老人家一個一個死咗之後，就會冇人要黃金，而金價只會愈跌愈低。」咁Ashanti係一間非洲金礦公司，信晒呢啲番鬼佬投資銀行嘅「專家」，開始拋空黃金，希望可以將來生產嘅黃金可以用今日嘅「高」價賣出，而唔係用將來嘅「低」價賣出。
投資銀行「專家」仲教路：「如果有人鬧你，問點解要拋空，你就可以站喺道德高地咁同佢講，呢啲叫做『用現代財技做科學風險管理』，叫做『對沖』。」Ashanti照做，頭個幾年金價真係下跌，Ashanti因為拋空黃金賺錢，個心亦都開始雄。Ashanti最後愈拋愈多金，拋空咗嘅黃金量仲高過自己生產量，金價一升，冇黃金賠畀人差啲執笠。
咁噚日，我食完lunch之後見得閒，所以就去咗江西銅業（358）嘅業績發布會。管理層講完業績之後，就畀人問問題，我隻金手指就開始充滿血液，蠢蠢欲動去篤、篤、篤。咁我即刻問吓關於江西銅拋空銅嘅問題，管理層就講咗一大堆「風險管理」、「對沖」之類嘅說話。我聽到覺得梗耳，不過因為唔想搞寸個發布會，所以鳴金收手指，點知其他人聽到都覺得唔對路，繼續問拋空嘅問題。問到連公關小姐都開始驚管理層會答唔到問題，就將問問題嘅時間腰斬。
孫柏文心諗：「你哋做賣銅生意，好心就對銅價有啲信心啦大佬！淨係識拋空。」
政府資助買香薰蠟燭
講起食lunch，孫柏文噚日就同因湊女忙碌，而暫時讓咗篇幅畀我嘅《利字當頭》一欄總舵主利世民兄食lunch。咁就唔知道佢喺邊度搵到「策發會」嘅會議議程。議程裏面講關於香港人口政策問題，咁世民兄即刻揭到其中一頁，有呢個要討論嘅問題：「現行政策強調生兒育女是個人的選擇，應否改變方針，制訂積極的政策，締造更有效鼓勵生育和多生子女的環境？」嘩！孫柏文第一個反應係：「政府出錢資助市民買香薰蠟燭！」
不過，我再諗一諗，世民兄生女，其實係真真正正幫助香港解決人口問題嘅人，正當我想多謝佢嘅時候，佢話真正要多謝嘅係世民嫂。佢仲話：「孫柏文，係時候到你都幫香港解決人口問題啦。」
我嘅回答係：「世民兄，我是一個不折不扣的愛國愛港人士，父母孕育我成人，都係希望我可以為特區政府效犬馬之勞，我技能不多，所以到現在都係冇機會幫特區做啲嘢。不過今次，我就可以為政府效犬馬之勞，做種馬！哈、哈、哈！」
孫柏文