湖南有色金屬（2626）上市後牛皮整固幾日，收緊貨，噚日卒發動升勢，由3.10元一路搶到上3.75元高收，大升0.65元，升幅20.9%，成交4億股，係掛牌當日以外的第二大成交，佔發行H股13.6億的3成。
江西銅業（358）派完成績表，股價亦急升，高開8.35元後，買家全程力掃，結果衝破9元大關，高收9.05元，大升1元，升幅12.4%，成交7000萬股。另外，靈寶黃金（3330）升0.75元，升幅10.5%，紫金礦業（2899）升0.30元，升幅6.5%。
金屬股熱炒，湖南有色已創出新高，但呢隻只係引子，主要係帶出五礦資源（1208）。五礦噚日雖亦上升，高見2.90元後回收2.825元，升6.6%，但同今年3.10元的高價，仍有一段距離。湖南有色急升後，五礦大落後，吸引力大增。
湖南有色噚日升上3.75元，市值亦去到120億元，05年度（12月年結）業績未宣布，上市時預測盈利計，PE係18倍。
五礦05年（12月年結）營業額33.3億元，上升159%；盈利1.82億元，下跌16.5%，每股盈利0.21元，往績PE13.4倍。
預測PE僅6.6倍
不過，五礦業績倒退，主要係因會計準則改變，令盈利減少約1.1億元；若無此數，每股盈利應為0.34元，PE只係8.3倍。以噚日五礦收市價計，市值48.4億元，「晒士」亦唔算細。
06年度，五礦收購母公司的「五礦鋁業」，提供全年盈利貢獻（去年不足3個月），順帶一提五鋁，05年嘅業績已好勁，營業額88.1億元，升20%，盈利4.49億元，升13%，今年金屬價格大升，五鋁業績會更理想。
五礦06年盈利估達7.2億元，每股盈利0.43元，預測PE只係6.6倍。湖南有色06年預測PE係16倍，五礦PE即使以10倍計，股價已可見4.30元。
講番個市，連續上升4日，大藍籌同中資股，全面造好，早輪消息奇準嘅中資線又來料，話中油（香港）（135）再開車，今次上升目標係6字頭。中油收報4.60元，升5.7%。油價又創新高，石油股同金股一樣，可以升到你唔信。
郭兆誠