香港狗仔隊設法拍王菲生仔的相片，菲老公吹風說到時可能會被迫在家匿埋生，不去醫院。這個恐怕是調虎離山之計，狗仔隊不是紙老虎，王菲兩公婆注定被追到天腳底。
將家裏佈置成產房，很不簡單，香港未聞有明星試過。婦產醫生根本不會答應，除非像靚佬湯這位廿四孝老竇，為了寶貴的頭一胎，不惜自資買齊儀器，第一部重型裝置是超音波監測BB儀，好似是二百幾萬港幣。幾個月後，記者再幫他計數，據報私人產房已經花上二百幾萬美金。靚佬湯豪使慣，不過生仔還是謹慎過人，已經安排好醫院，掛一漏萬。
「家產」有風險，畢嫂「羅拉」選擇離開家鄉是非地，溜去非洲納米比亞待產。這個名氣非洲不同那個無國界醫生非洲，畢嫂一家包下整座豪華酒店，獨霸長灘，保鏢跟身，還跟省長吃早餐放料說，肚裏的小羅拉會在非洲出世，更考慮改一個納米比亞名字。聽得省長喜上眉梢執到寶般，馬上宣佈「戒嚴」，趕絕狗仔隊。《南非星期日時報》突破省長的重圍拍到畢哥的新髮型，代價卻是遭保鏢毆打。一個願打一個願捱，孩子未出生已經習慣鎂光燈，將來就不是目光如豆之輩。畢家正為孩子的教父事宜爭論，畢哥鍾意老友佐治古尼，媽咪眼角高些，希望跟Bono上契。兩位都對靚佬開玩笑對親家之說耍手擰頭，靚湯撞板，證明樣靚、食埋胎盤都冇着數！生仔的娛樂新聞，遠離政治宗教和打打殺殺，小眉小眼，讀者看得輕鬆，有助腸道消化，得多謝這批「接生」狗仔隊。