恒指再升192點。美國息口可能見頂之說，帶住美股上，帶埋港股漲，地產股也文也武，新地（016）做正印，一升就係4.2%，新地1日之間市值增加83億元。
恒指升，貢獻比重則仍然係中移動（941）同滙控（005），兩者總共帶起恒指84點。新地當然亦唔算細，着咗26點，功勞排第3。
上月底至今，恒指已升1025點（6.4%），H指已升419點（6.2%），紅指已升273點（12.5%）。紅指升得最勁，因為成份股中有隻中移動佔大份。
喺近排升潮中贏到七彩者，都應該開始收收手，將注碼減細，冇賺過嘅，更加要忍忍手，因住個市會有回吐。
中海油C輪2159：油價升，中海油（883）得益，收6.70元，升0.15元，逼近新高。中海油C輪一支箭咁彈上，暫時買唔落手，吼正股回番20-30仙，喺低位撈C輪。正路之選係2159，7月初夠鐘，輪價77仙，溢價1%，槓桿率8.7倍（有效7.4倍），引伸波幅24.7%。冇平貨，唔買住。
太AC輪9146：太A（019）收80.90元，跌25仙。等再跌啲，買C輪9146。6月尾到期，輪價30.5仙，溢價2.7%，槓桿率26.5倍（有效13.7倍），引伸波幅21.8%。
章盛