港股升勢一發難收，噚日再一棍，又大升近200點，恒指再創出今年的日中同收市新高（16898同16830），成交增至476億元，係今年最勁，亦係歷史第二高，僅次於政府入市的790億元。
大市噚日雖創咗3個紀錄，但市場並唔係一面倒，唔計認股證，下跌股仲多過上升股，好多股價由高位回落個勢都幾急，正式係風高浪急，小心！唔排除大市已進入派發期，但唔代表恒指唔會再升。總之，未來的大半個月，市勢仍然會好旺，大戶會一路造住啲大藍籌同大國企嘅指數股，而派發其他股份；所以，即使中國人壽（2628）業績比預期為差，股價都係要起，造指數。
哈爾濱動力（1133）多賺3倍，但股價就連跌兩日，由歷史高位7.35元跌到噚日最低的6.15元先反彈，收6.30元。點解哈動會跌，一來唔少人趁好消息出貨，二來公司話到明會再批股集資，令到沽壓大增。
手頭定單夠3年發展
哈動05年度（12月年結）嘅業績幾好，營業額184.6億元（人民幣．下同），升80.7%；獲利4.64億元，升295.5%；每股盈利0.389元，升293%；末期息派6.1仙，升19.6%。除事先張揚的批股打窒買意外，派息亦比預期為少。
哈動噚日大跌，沽盤有如泉湧，但全日成交4480多萬股，係1年來嘅高紀錄，趁低吸納者亦大不乏人。事實上，哈動落番6元水平，確係低吸嘅好機會，因為未來兩三年，哈動盈利仍然會有高雙位數嘅增長。
哈動去年做生意184億元，但接獲新定單亦有184億元，加埋今年首季已接單100億元，手頭上未完成嘅定單有700億元，足夠未來3年發展。最重要一點，係早幾年接落嘅低毛利定單已大致完成，高毛利定單開始提供貢獻，例如去年上半年毛利率係8.27%，下半年已上升到11.27%。另外，鋼鐵價格已由高位回落頗多，對哈動亦好有利。
現年度，估計哈動盈利可上升70%至6.9億元，07年度可再升至10億元，每股盈利分別為0.56元及0.81元，以07年10倍PE計，1年目標價係8.10元，有30%的上升空間。
郭兆誠