以前睇占基利的《神探飛機頭》、《變相怪傑》同《大話王》，嫌佢誇張做作，可惜，我更受不住他在《無痛失戀》中喊晒口演深情男子；今回占爺再施看家本領演《賊壇新人王》，孖住泰莉安妮做對賊公賊婆，兩公婆扮鬼扮馬去搶去偷，過程烏龍百出有啖好笑；占爺，還是繼續做你的笑匠吧！
記者：招佩珊
《賊壇新人王》是1977年《FunwithDickandJane》的重拍版，當年由珍芳達同佐治史高主演，主角Dick同老婆Jane一家三口住豪宅食慣歎慣，一日Dick被公司開除陷入財困，最後夫妻檔上陣齊齊「做世界」；2005年版本有占爺監製兼主演，新瓶舊酒，他以自己一套搞笑方法將中產人士的鬱結宣洩出來。占飾演的Dick工作多年終獲老闆賞識，唱住R.Kelly《IBelieveICanFly》去見大老細，終於恨到升為集團副總裁；但新職上任第2天，老闆掏空公司走佬，占的股票積蓄變廢紙，仲要替公司孭鑊。老公失業，老婆又以為可以做少奶奶辭埋份工，兩人愈窮愈見鬼，眼見老闆偷呃拐騙賺到笑，於是，有樣學樣做對賊公賊婆。
占爺扮雪兒嚇怕阿女
戲中兩公婆由起初慌失失只敢飲杯思樂冰唔畀錢，到後來愈偷愈大膽，仲整古做怪以唔同造型打劫，例如戴大頭面具扮克林頓同希拉莉，其中一幕占爺打扮成雪兒（Cher），真夠「妖」！連他在特別收錄訪問中，自言最喜歡此造型，不過，嚇到來探班的女兒走夾唔唞。造型以外還得有演技，占爺繼續賣弄其誇張表情；但不知是因應劇情而略作收斂，還是演喜劇多年開始現疲態，覺得欠了當年演喜劇全盛時期的那股火，但反而令我睇得舒服，至少今回唔嫌他誇張。
加映3場打劫戲
今勻大家買碟唔使煩惱揀單定雙，港版3區DVD一碟搞掂；好在電影之外，仲有特別收錄片段：三分幾鐘的占基利訪問，根據目錄標題顯示是剪輯自某記招，剪得零零碎碎重點問到喜歡哪個打扮、與女角合作感覺如何等例牌Q&A，淥好個杯麵，就已經睇完唔夠喉，但占爺繼續七情上面，好戲！蝦碌鏡頭仲少，齊頭三分鐘，何況，唔多覺爆笑，片短亦唔覺損失。另外，睇戲時可以選擇聽製作人講評，從另一角度欣賞《賊》，但中文字幕講評欠奉，考起大家英文聽力。還是刪剪片段夠足料，合共有6段之多，其中3段分別是打劫家品店、影視店同玩具店的戲份，後者是占與玩具店看更老伯對待，你一拳我一腳幾搞笑，但四分幾鐘長，放入電影就嫌冗長，睇完其餘5段被刪片段，佩服剪片人員的英明，再長只會拖慢節奏，最後落得悶戲一場，家陣約90分鐘夠睇喇！
PROFILE
區碼：3區 聲效：DD5.1
字幕：中、英、韓、泰、西班牙
發行：年代電影（香港）
