首先，孫柏文又要再一次變成為白銀文，幫我嗰隻金手指邀功，因為銀價已經升穿14美元一盎斯。原因可能係我哋兩位港產國家領導人，噚日睇完《金手指》，明白到今時今日響番鬼佬度攞番祖國嘅白銀，可以幫助抹清祖國人民，喺十九世紀因為《南京條約》要賠白銀2100萬両，而帶來嘅恥辱。
雖然，14美元一盎斯白銀，離開金手指篤過嘅120美元一盎斯目標價仲有好遠。由我3月6日叫大家買白銀到𠵱家，白銀需要升嘅幅度，已經由原先嘅12倍，去到今日嘅8.5倍。不過，千萬要記得，隨時都係入市買實貨白銀嘅好時機。
邀完功，孫柏文就想用隻金手指去篤爆一個謬論，呢個謬論就係──銅鐵油上升係一個泡沫。我哋香港人，已經有好多年冇炒過原材料，只係炒啲「食唔落肚」嘅股票同樓。
我話銅鐵油可以「食落肚」，唔係話銅鐵油真係可以擺得入口，而係指呢一類原材料，係會被人消耗。即係話，每日有好多人做「用家」，買原材料攞去用，而唔係好似股票同樓咁，最後都要賣番出市場，個個做「炒家」。
炒家用家分清楚
大家可能會問：「我買樓嘅心態係買嚟自己用，點算係炒家。」咁孫柏文只會反問：「炒家A，你買樓嘅時候，有冇諗過層樓第日出售時，有冇上升空間？又做個比較，假如你係一個車主，攞架車去入油，有冇諗過繼後電油價錢上升，可以出售買咗嘅電油去獲利？」我都相信大家明白，原材料市場唔可以同股票市場相提並論，因為就算價錢高企，每日都有人買原材料去用，而唔係得啲炒家用高價錢買，希望可以用更加高嘅價出售。
銅就係最好例子，由年初到𠵱家已經升咗50%，人人都話銅出現泡沫。不過如果細心啲研究銅市場，你會發覺銅長升長有嘅最基本原因，係各大原材料交易市場嘅銅存貨，屢創新低。銅存貨愈來愈少，就等如好多人用「泡沫價」買咗銅之後，攞走去用。
情況就似頭先個車主一樣，就算買貴油，都冇諗過將手頭上嘅銅賣出。大家可能會問：「存貨去到零嘅時候，會點？」其實好簡單，只要銅價升到一個「夠高」嘅水位，世界可生產銅嘅量，就會等如世界消耗銅嘅量，存貨亦都不會繼續愈來愈少。
雙重優勢先可發圍
好明顯，2003至2005年嘅銅價未升到一個「夠高」水位，所以銅存貨愈嚟愈少。如果想知道，銅去到6500美元一噸係唔係到頂，只要睇存貨量有冇開始穩定，還是繼續跌。如果存貨量係繼續跌，咁銅價就會繼續升。
呢幾日，江西銅業（358）升咗好多，不過完全未反映銅價上升，同埋銅存貨量愈嚟愈少。噚日江銅收市之後出咗非常好嘅業績報告，所以，今日開市後江銅股價可能會有下調壓力。咁江銅如果真係開市嗰時跌，大家應該當呢個係入貨嘅最好時機。
講起原材料上升，其中一個好大嘅原因，就係各大以凡人為首嘅中央銀行，都係喺度濫發鈔票。咁濫發鈔票，除咗會令到原材料上升之外，還令到所有其他如股票之類嘅資產價錢上升。
好多「醒目仔」就落重注，係啲原材料扮演重要角色嘅經濟體系裏面買股票，因為有雙重優勢，可以贏到開巷。例如沙地阿拉伯同埋冰島嘅股票市場炒到變泡沫（見圖），咁就算基本因素幾咁健全，都可以大跌市，大家賭股票，就記得要有危機感啦！
孫柏文