女生除了渴望擁有一張瓜子臉、一身透白的肌膚同36．24．36身段外，還需要一把靚靚秀髮。眼見洗髮水廣告中的女主角把長髮舞來舞去令到發光，多羨慕！要頭髮靚靚，除了洗頭，原來黑芝麻都有烏黑秀髮嘅作用，而且唔似得食芝麻糊咁膩，想今個夏天「瘦」髮黑過墨斗？就要跟師傅學嘢喇！
記者：黃若茵
攝影：周旭文
模特兒：Va@PureModels
示範：沈師傅、施師傅@帝苑酒店
Va：我每次去食糖水都會揀芝麻糊，食得多，把頭髮真係又黑又滑，𠵱家啲頭髮咁靚，我唔會染其他顏色㗎！
肥牛生煎包底脆面鬆軟
價錢：$15/2人用
需時：1小時30分鐘
芝麻雖是配料，但黏在生煎包上可使淡而無味的包皮更香口，粒粒芝麻加上鬆軟包，好有口感，餡料亦可根據個人喜好配搭，以下份量，當然係師傅研究成果。
材料：
麵粉4両、肥牛4両、薑葱1両、黑芝麻1錢
做法：
1.以約3両開水搓好麵粉，弄至一小塊的圓形粉皮待用。將肥牛及薑葱切粒，以粉皮包至球狀圓形，將粉皮頂端以拇指及食指黏合。
2.黏合後頂端位置輕手沾上黑芝麻，將生煎包於室溫放置1小時讓粉發酵。
3.於平底鑊加油，放上包後加入預備好的滾水落鑊，以大火蒸10分鐘即可。
Tips：
若材料份量要增加，搓麵粉的比例應以1斤麵粉混入7両開水做標準。發酵時間要準確，1小時最為適當，太短包皮會變韌，過長則會變酸。
海鹽芝麻焗蝦 醒胃驅寒
價錢：$34/2人用
需時：30分鐘
海鹽能為肌膚補充營養，增強抵抗力，混合香勁十足的乾辣椒、花椒及黑芝麻一焗醒胃又健康。加上海蝦肉質滑爽肥嫩，又屬溫熱性食物，有助驅寒。
材料：
海蝦8隻、海鹽4両、黑芝麻2両、乾辣椒1両、花椒8錢
做法：
1.剪掉蝦腳，以竹籤從蝦尾插入，放入滾油炸15秒，讓蝦殼離肉製造虛位，稍後鹽焗時更入味。
2.海鹽以160℃焗10分鐘後，混入黑芝麻、乾辣椒及花椒以慢火炒2分鐘。
3.將海鹽及芝麻等撞入盛載海蝦的容器內，焗2分鐘（160℃），讓配料的濃烈味道進入蝦肉中即成。
Tips：
可於盛蝦的容器外加一個小木桶，以保持溫度及確保蝦肉更入味。
擂沙湯圓美髮美白
價錢：$10/2人用
需時：30分鐘
自製擂沙湯圓想起來似是複雜麻煩，其實跟住步驟做都好容易。除了黑芝麻餡料有助美髮，連撒於面的黃豆粉亦蘊含豐富的維他命B及蛋白質，可美白肌膚。愛甜食的女生可以大條道理，以美容藉口大食特食啦！
材料：
糯米粉4両、黑芝麻2両、黃豆粉1両
做法：
1.洗淨黑芝麻用慢火炒，再調至猛火，炒約15分鐘至聞到香味。炒後磨粉，加少許白砂糖及油搓成丸狀待用。
2.以約3両開水與糯米粉搓出粉糰，壓至粉皮後包黑芝麻丸，粉糰黏合並搓成圓形。
3.放入水中煮10分鐘，完成後撒上黃豆粉即可。
Tips：
要控制好水的溫度，以加入冰塊的開水混成的糯米粉皮最為嫩滑。
師傅有料到
沈師傅：要有耐性
有15年製作點心及甜品的經驗，示範了生煎包及擂沙湯圓。為做好擂沙湯圓的芝麻餡，師傅都親自負責炒芝麻的工作，他指出要炒出夠香夠乾脆的黑芝麻，一定要有耐性。
小炒專家 施師傅
入行16年，專門負責小炒中菜，今次教大家一味海鹽芝麻焗蝦。師傅於創作此款菜式時本身沒有選用黑芝麻，但發覺喺香口嘅海鹽焗蝦上再加黑芝麻後，味道確實零舍不同！
米施洛營養護康中心註冊營養師胡凱恩：防止脫髮
「對於頭髮嚟講，油份唔平衡嘅話會令頭皮皮脂腺分泌過多，有損頭髮健康。黑芝麻嘅油份內嘅維他命E有抗衰老功效，有效防止脫髮同白髮嘅出現，頭髮亦相對變得烏黑健康。」
