自從煲呔做咗特首，啲港英餘孽又翻生晒，好似WK林煥光咁，唔經唔覺又復出咗成個幾月。八方聽聞，做咗奧運馬術比賽有限公司行政總裁後，林煥光已經開始喺香港同北京之間飛嚟飛去。
噚日咁啱係WK五十五歲生日，梗係要好好慶祝一吓，因為冇人估到佢舊年會忽然劈炮唔撈，老董跟住腳痛下台，然後佢今年又有機會重出江湖，為中港兩地政府效命，搞奧運馬術比賽。
八方都有打個電話去祝林總生日快樂，不過就唔知佢點慶祝，老婆大人有冇插番盆靚花祝佢年年有今日。
WK一向人緣好，所以冇乜人再提起佢位前女友，睇嚟一切已告一段落，佢份新工聽講進展得好順利，啲國際機構都話滿意工程進度，𠵱家間公司正請緊人、埋緊班，遲吓就會搬去中銀開工，跟住梗係要籌錢啦，到時WK就冇得再好似以前咁戴住個口罩唔畀人見。
傳真︰2623-9278
電郵︰[email protected]