譚耀宗啱啱喺貴州返嚟，上足電，之後又要為未來密質質嘅工作拼搏。今次譚sir去貴州都獲益良多，事關佢率領嘅教師校長團，最初都係諗住去傳授一啲教英文嘅方法畀當地老師。
一般人一聽，都可能有錯覺，覺得內地老師英文水平麻麻，點知原來事實唔係咁噃，譚sir話佢哋啲英文都有番咁上下水平，之不過，用普通話教英文，都係有少少難度，所以都係要靠啲校長老師傳授啲錦囊畀佢哋。
佢哋個團仲順道去埋安龍縣山區一間師範學校參觀，仲即席設立咗一個資助計劃，希望培訓到有心人做教師。當然，唔係完全免費㗎，受資助嘅有心人讀完書後，要承諾喺山區做教師一年，回饋番社區先得。
譚sir對呢個計劃抱有好大期望，希望可以真正為山區貧困兒童提供更多教育機會。
傳真︰2623-9278
電郵︰[email protected]