由譚詠麟（阿倫）作統籌的二○○八年北京奧運宣傳活動主題曲《奧運北京》，一連兩日在尖沙嘴進行錄音，李克勤、吳國敬和許志安等歌手昨日率先到場，劉德華和關淑怡稍後會到，成龍則今日才會錄音。
成龍埋尾
由吳國敬作曲、向雪懷填詞的《奧》曲，在三百多首提名的歌曲中獲選，阿倫透露整個活動是由北京政府無限量資助，他說：「啲歌手都係不計酬勞嚟參與，除咗會有香港版本之外，亦會有國內及台灣版本，分別係由當地嘅歌手演繹，可能會加第四個版本，就係將中港台三個版本混合而成。」
問到由哪位歌手打頭陣獻唱時，阿倫說：「上面話一定要我唱開頭嗰句，而成龍就會唱最尾四個字，不過成龍想唱多啲，但係驚佢到時會霸住個錄音室。」
安仔前年為無綫主持奧運時被狠批，問他會否繼續擔任北京奧運的主持時，他說：「我想睇多過做，會投入啲。」
採訪、攝影：王連連