政府嘅勾地表只係得一幅中環街市商業地皮供發展商申請，咁即係話未來中區新供應有幾多，一隻手已經數得晒，搞到班中環租戶都好擔心約滿後，業主會勁加租，所以有啲都面對現實，叠埋心水買番個單位自用，費事再為加租問題而煩惱。
一個金鐘區租客，有見租約明年初就到期，諗住買個連租約單位，收住租先，等自己嘅寫字樓約滿後，就收番嚟自用，既有預算，同時又可以鎖定個價，唔使到時至買又要畀貴啲。
但係呢個如意算盤，始終都打唔響。因為市場只得金鐘力寶中心2座高層02至03室呢個交吉單位啱心水，粗粗地都買咗先。單位面積2150方呎，成交價1688萬，每呎7851蚊，略低於市價。
中原香港商業部營業董事何紹榮話，業主原本開價每呎8000蚊，見個客有誠意，所以平些少賣。
金鐘力寶中心一向係熱炒嘅甲級商廈，交投零舍活躍，業界話原因係力寶單位夠多元化，乜嘢尺碼都有供應，客路咁闊，所以就算市靜時，點都會有啲成交。
電郵地址：[email protected]