華華舊年睇咗套電腦動畫戲《荒失失奇兵》（圖），英文名叫做Madagascar，講四隻動物流落咗去一個非洲對開嘅馬達加斯加（Madagascar），勢估唔到噚日華華近距離訪問到馬達加斯加嘅總統MarcRavalonmanana，當然唔少得話會喺當地掘油嘅信用卡防盜（1051）主席黃金富啦！
黃金富嘅最佳拍檔、公司執董劉夢熊，仲趁機同傳媒吐苦水，話先前有傳媒質疑佢哋個石油項目，係曲解佢講話內容，仲話個節目經已抽起，網站內容亦刪除咗喎！又話講乜都無謂，最緊要盡快掘第一桶油出嚟，咁就掂晒啦！
馬總統補充，佢哋之所以揀咗黃金富同埋劉夢熊呢對奇兵做拍檔，完全基於信任，之前好多跨國汽油集團都有嚟過做勘探，但係遲遲都冇郁手，而佢哋最需要嘅就係行動！唔知點解，聽完呢個故事，令華華諗起差啲唔記得嘅《荒失失奇兵》個結局。