香港總商會總裁翁以登做埋今個月底，會飛去西雅圖學煮咖啡三個星期，之後就去上海幫星巴克拓展大陸市場。現時全國約有一百八十間星巴克，翁以登話佢嘅目標係五年內增至一千間！臨別秋波，佢噚日同班記者細說香港情。
翁以登97年4月嚟香港做總商會總裁，回歸後至今，經歷咗九年光景，佢話香港的確變咗，以前香港係唯一進入中國嘅大門，房地產又好價，錢好容易「撈」；𠵱家大家多咗注重成本，講求競爭力同增值；佢唔認同香港被邊緣化，香港仍然掂，只係香港人需要加強自信心。
仲有，以前商店員工只學日語、英語賺歐美日旅客錢，𠵱家就學普通話賺中國人錢。
佢又話家吓政治活動多咗，香港人對政府要求高咗。但佢覺得好失望嘅係，政策討論唔夠深度，成日以陰謀論睇嘢，「睇吓邊個同邊個食飯，邊個亞媽同邊個打牌，邊個出糧畀佢……」又好似直選嘅爭拗亦好無聊兼冇建設性。
曾蔭權做得唔錯
翁以登覺得𠵱家嘅政治架構好唔妥，一啲反對勢力利用傳媒發出嘅聲音，遠遠高出佢哋嘅代表性，令到代表少數嘅反對聲音可以阻住政府推行有利社會嘅政策。喺咁艱難嘅政治環境下，佢認為曾蔭權已經做得好唔錯。
對於香港年輕一代，佢嘅忠告係，唔好有太多長遠嘅計劃，「16歲就諗住點樣做到安永合夥人，咁樣會好攰!」只要做好眼前嘅工作，就係為將來打下最好嘅基礎。呢個亦都係佢自己人生路上嘅寫照。
李華華
讀者如有任何意見或報料，歡迎發送電郵[email protected]。