有無諗過可以將自己隻腳Fing上個頭度？又有無諗過用兩隻手撐起全身？興咗一排，瑜伽喺香港仍然極流行，懷疑有印度神奇力量，令一啲自己以為不可能嘅動作變成有可能。不過，玩瑜伽做高難度動作最緊要小心，除咗唔適宜食得太飽，仲要量力而為做足熱身，關節有病者更要注意，一個唔好彩甩骱整親唞一排，肥減唔成，強唔到身健唔到體，坐足一排翻肥10磅，大鑊！呢個夏天邊度都唔使去喇！
記者：馬慶武
攝影：陳偉強
Model：Phoebe、Kinki（Salvador）
鳴謝：康正綜合治療中心
「好多病人亂玩瑜伽受傷」
𠵱家市面教玩瑜伽嘅教練大都已經註冊，基本上跟足指示再留意埋自己本身有無關節傷患，應該安全過有身體碰撞嘅運動。但係唔理失手又好、疏忽又好，做呢類高難度動作始終有受傷嘅可能，而且近排受傷個案鑊鑊新，應該要更加小心。有教練傍住仲驚青？咁有物理治療師加瑜伽教練教路應該可以令你定番啲。
首推水療×瑜伽
Ada係註冊治療師，仲全港首次將水療同瑜伽二合為一，佢話好多嚟搵佢做物理治療嘅病人都係玩瑜伽出意外玩到受傷，所以就開辦水療瑜伽班，等大家減低受傷機會兼歎埋水療功效。如果堅持要喺陸上玩瑜伽，Ada一樣幫到手，教大家做正確熱身運動，仲示範埋幾款高危動作，有備無患唔使怕。
1拱橋
彭丹拱橋腰部容易扭親，注意完成動作後亦要慢慢瞓番落地，千祈唔好一嘢「撻」落去。另外如用力不當，仲有可能引致膊頭甩骱。
2肩立
因為體重聚於呢兩個位置，所以最容易整傷頸、膊位，另外呢個動作亦會令血液流向頭部，有心臟病或高血壓者咪試！
3金雞獨立
看似簡單，但好容易因為要保持平衡扭動身體而弄傷腰部，單腳站立失平衡又未能企穩仲好易跌親。
4上下身扭動
容易受傷位置係肩部及中背部，因為上身同下身扭動方向唔同，所以有機會拉傷肌肉，切記做時動作要慢。
5鶴式
最容易造成手部甩骱嘅動作，因為全身體重完全由兩隻手負荷，所以好易令手部受傷，由肩膀位到手腕都有可能，若失平衡更危險。
心臟病忌玩高溫瑜伽
Ada話瑜伽係全身運動，而且將身體拗嚟拗去動作好大，所以玩瑜伽之前一定要做足全身熱身。除咗手腳要做拉筋動作外，關節位亦要留意，而做瑜伽最容易受傷嘅就係肩背肌肉，切記咪疏忽！
腳上頭下易腦充血
不過講到最重要一樣，就係要認清自己本身有無關節炎或心臟病，有關節炎嘅就應該盡量避免玩瑜伽，如果真係興趣咁大唔玩唔安樂，咁就要就住患處，千祈咪做扭曲動作。另外若患有心臟病或高血壓人士亦要留意，雖然瑜伽不算是劇烈運動，但某些動作如腳上頭下嘅姿勢，會容易令腦部充血產生危險，高溫瑜伽閒閒哋都喺攝氏40幾度環境進行，更加應該唔好掂！
事前必做熱身
‧主要係膊頭位置嘅熱身運動，用右手用力按左手臂，重複左右各做3次。
‧肩背位嘅熱身，用左手按右手手踭，可以將肩背肌肉拉鬆。
‧小學都有教，拉背熱身運動，因為做瑜伽成日要腰部用力，一定要做。
‧全個上半身嘅熱身運動，同樣動作要慢，做唔到唔好勉強。
‧做完上半身，輪到下半身，除了可以有壓腿拉筋功效之外，腰要挺直，對腰下半部伸展亦有幫助。
瑜伽學員點睇
小心舊患 動作要慢
瑜伽分不同種類不同級數，都無話一開始就要你Fing對腳上頭咁誇張，但係有啲動作睇嚟簡單，以為實做到，但係原來暗藏「殺機」，好容易拉傷肌肉或者引致甩骱。Ada就介紹咗幾款動作，話埋畀你聽邊個動作容易整傷邊個部位，自己知自己事，嗰個位有舊患就唔好做嗰個動作，仲有，覺得難，覺得勉強嘅就要即刻停止。不過就算無傷無痛，做每個動作都最緊要夠慢，咁就無有怕啦！
免費過幾招
除咗高危同熱身外，Ada話瑜伽都有好簡單嘅動作，唔使特別學都可以跟住做，有助強化不同部位嘅肌肉，書都慳番唔使買，免費！
A可訓練平衡力、集中力，而且仲可以預防骨質疏鬆症咁神奇！
B可以鍛煉腹部肌肉，對改善腸胃及女性病都有幫助。
C加強背肌強度，坐骨神經痛病人更應多做，對病情有幫助。
水療瑜伽 大肚婆都做得
有無聽過有人會喺泳池跌親吖？水有浮力，唔計你唔識死，唔識游水仲去兩米池，喺水中做運動係比陸上做運動安全，而且亦唔使付出咁大力量。Ada話水中瑜伽喺外國一向都有，佢哋首次引入嚟香港，之前介紹過，適逢呢排瑜伽意外增多，Ada提多你一次，水中瑜伽連孕婦、小朋友都做得，一啲陸上瑜伽嘅高危動作，喺水中亦好容易做得到，安全啲。
水療瑜伽課程
查詢電話：25258707
收費：每6堂$3,000
Model點睇
註冊物理治療師Ada：幾多病人因為玩瑜伽而整傷肩背，其實做咩動作都唔好夾硬嚟。」
