由陳凱歌導演、張栢芝同張東健主演嘅《無極》雖然已落畫多時，但最近內地黨報《人民日報》就有篇署名李長虹發表嘅文章，批評呢部戲之前喺雲南香格里拉，拍攝一場高山展現出杜鵑花海嘅畫面時，對當地自然景觀造成破壞，作者認為對破壞生態景觀嘅行為，應該嚴肅處理。
籲多作監管
《無》片喺香格里拉位處海拔四千米嘅碧沽天池取景，作者就話未拍片之前嗰度池水好清，池畔遍布鮮艷嘅杜鵑花，周邊又有個森林同綠油油嘅草地。但自從拍完呢部戲之後，靚到絕嘅天池就好似毀咗容咁，飯盒、酒樽、膠袋、雨褸等垃圾代替晒杜鵑花海，以後花海好難再現。
作者要求有關方面唔可以亂開綠燈，隨便借出國家文物景點畀製作公司拍戲，就算借，都要有監管。