今個復活節最過癮莫過於睇雜誌。
《國家地理雜誌》封面係《猶大福音》（TheJudasGospel），《時代雜誌》封面係西班牙主業會（OpusDei）。
《達文西密碼》一紙風行，仲拍埋電影，影響真係好犀利。因為本書講過西班牙主業會，咁就成為雜誌封面。冇嘅，大家想知多啲囉。
《達文西密碼》係小說，都仲可以真真假假，但係《猶大福音》係歷史文物，咁就真係唔講得笑。
《國家地理雜誌》係好權威嘅雜誌，佢哋都會怕係假嘢，所以請晒頂尖嘅專家、機構做鑑定。好嘞，佢哋話係真嘅，咁歷史咪要改寫？至少一定會引起好大爭論。
猶大獲平反變英雄
二千年以嚟，猶大就代表咗貪財、虛偽、執迷不悟嘅化身。佢𠵱家平反變番英雄，咁又真係好戲劇性。《猶大福音》一開頭就話：「這是秘密記載，透露耶穌與加略人猶大在一周之間的對話，三日後便是逾越節。」
最重要一段係耶穌同猶大講：「……你將凌駕他們所有人，因你將犧牲遮蔽我的肉身……後人世代都會譴責你──但是你終將統治他們。」
呢部福音書並冇提到耶穌被釘十字架同埋耶穌復活。如果冇咁嘅事，咁我哋仲會唔會有復活節？諗真喎，冇得放假喎？
講番《達文西密碼》，部戲會喺五月中上畫，肯定會帶嚟一陣達文西熱。當初本書出版時書商已經同讀者玩猜謎遊戲，𠵱家北京嘅書商又係咁玩，獎品有純金掛件同T恤。香港到時又會有好多猜謎遊戲。
《達文西密碼》嘅作者俾人告話佢抄襲不過告唔入。原告人本書《聖血與聖杯》（TheHolyBloodandtheHolyGrail）我十幾年前睇過，真係睇到眼都凸晒。吓，耶穌冇死到仲有後人？聖杯唔係杯而係指血脈？
英國皇室成員係蛇
我仲睇過一位教宗嘅傳記，呢個教宗係女人。係呀，曾經有女人做過教宗㗎。
又有人話英國皇室成員係蛇嚟嘅，戴安娜係俾人用嚟祭神嘅，你信唔信？唔信上網查吓DavidIcke睇佢點講。
其實《達文西密碼》引起大家興趣都係好事，當係通識教育。
《最後的晚餐》坐喺耶穌身邊嘅係唔係女人？有冇個M字？《蒙娜麗沙》（MonaLisa）的名字係古埃及的父神同母神加埋，即係達文西將自己作為一個女人嚟畫嘅自畫像。
你信唔信？
觀火
傳真︰2623-9278
電郵︰[email protected]