家陣每人閒閒地有幾張信用卡，要人開新卡難度愈嚟愈高，之不過卡數貸款息口高，又有佣收，對銀行嚟講確實好吸引，所以唔少銀行都出盡法寶，好似永亨拍住JCB出新卡，就出動PSP做免費迎新禮物（4月22日頭五十個成功申請者有得送）。
永亨信用財務助理總經理吳幗欣（圖）話，個廣告12號一出街，申請熱線就即刻俾人打到爆晒，係威係勢，有間超級大行馬上跟風，用PSP迎新，再加埋架值萬八嘅32吋LCD電視，實行追住嚟打兼搶客，果然商場如戰場！
俾大行追住打，吳幗欣一啲都唔驚，仲笑笑口話做得細行都唔會太貪心，只係望年底前有三四萬個新客仔心足啦！
96年加入永亨嘅吳幗欣，年底就夠期攞十年服務獎，平日返工做到暈，放假梗會去旅行輕鬆吓，最鍾意係JCB嘅大本營──日本。每年至少去一轉東京，最瘋狂嗰年去足四次，但次次都係匆忙玩幾日。