多得阿爺打救香港，決定落實QDII，令到大市昨日急升，小初呢類小股民自然炒得更加開心，可惜昨日推介的兩股，1隻升1隻跌，浩基（628）跌6.67％，收2.10元；漢寶（228）則勁升25.47％，收3.325元。不過，經紀陳就堅持己見，話兩隻都仲有得炒。
經紀陳仲話，港股雖然長升長有，但藍籌股及實力股已升得八八九九，股民要搵其他嘢炒，自然轉向呢類三四線股，現時輪到股仔當旺，係熱炒時機。
好似早兩三年前曾經係神仙股嘅高寶綠色（274），股價有好長時間在0.70元至0.80元水平橫行，但自從宣布將在4月27日公布全年業績後，股價日日升小小，好明顯有人偷步炒業績。
高寶綠色中期盈利有1.08億銀，較去年同期大升152.92％，如無意外，全年業績應該好掂當。高寶昨日升4.65％，收0.90元，成交金額2237萬元。
慕容小初