上個禮拜，孫柏文講咗本欄叫《金手指》嘅原因，係因為想紀念一齣叫《鐵金剛大戰金手指》（Goldfinger）嘅花旗國電影。因為戲中講祖國政府英勇地計劃一場在美帝手中，攞番中華人民多年來被搶去黃金白銀嘅行動。國富家強當然是件好事，不過從番鬼佬手中攞番啲白銀，唔係淨係將祖國財力增強咁簡單。孫柏文亦都曾經講過，「買實貨白銀」本身就係一件不折不扣嘅愛國行動，係每一個中華兒女、炎黃子孫都應該做嘅事。咁今日，適逢國家主席胡錦濤訪花旗國，孫柏文就用隻金手指，同大家講點解。
世界上軍事第一強國，眼見對華貿易出現嚴重赤字，就張牙舞爪要求祖國政府「做啲嘢」。祖國政府亦都眼見祖國人民生產技術比世人精湛，祖國產品比其他國家出產的貨品價廉物美，就抱着一份無奈心情，希望各國政府支持同尊重各國人民之間嘅自由貿易。覺得喺自由市場機制調節之下，任何國家出現長期結構性貿易赤字之後，都要檢討自己嘅生活及消費模式，最終發奮圖強，製造一些祖國人民覺得值得購買嘅產品。不過，奈何這個軍事強國，為咗自己國民不需要檢討消費模式，就用盡一切無賴手段，例如強迫祖國人民去用一啲原本唔會去買嘅產品，去「平衡」貿易上出現嘅赤字，繼續無止境地買我國廉宜嘅產品。
祖國人民迫於無奈
係我醒目fan屎嘅你，一定覺得金手指今日會篤吓，究竟花旗國政府會點樣強迫祖國人民，去買花旗國嘅產品；而覺得好無奈嘅祖國政府，又會點樣強迫啲公司，配合花旗國政府嘅要求。例如要求已經被戴爾電腦打殘嘅聯想集團（992），用12億美元向被花旗國法院裁定壟斷，代表曾經剝削花旗國人民嘅微軟公司買軟件。又或者要已經因油價高企同唔夠人坐而蝕大錢嘅祖國航空公司，硬吞飛機好多架。不過以上嘅猜測都係錯、錯、錯。
其實金手指今日係想講歷史。十九世紀初，祖國人民憑茶葉、絲綢、陶瓷等產品，贏盡前宗主國人民嘅歡心。亦因前宗主國嘅產品，全部都是粗製濫造，各國人民進行自由貿易嘅時候，祖國人民迫於無奈之下，只可以接受白銀兌換產品。前宗主國政府，眼見國民因迷戀祖國嘅優良產品，令到大量白銀流向祖國，心懷不軌咁開始販毒。
為抹清恥辱出力
當時，前宗主國從印度國王買咗造鴉片嘅藥方，跟住就引誘祖國人民去試。亦因用鴉片成癮嘅機會極高，千千萬萬嘅祖國人民一試上癮，令到前宗主國嘅毒販，成功夾走祖國多年積累嘅白銀。到1839年，清官林則徐採取行動，將相等於一年供應嘅毒品消滅，一廂情願咁仲估販毒嘅人，係前宗主國枯枝，而唔會得到前宗主國軍力嘅全面支持。林則徐當然係計錯數，我哋祖國被人打到一仆一碌，繼而被迫簽咗祖國不平等條約系列第一炮嘅《南京條約》。除咗將香港島割畀前宗主國，仲要賠白銀2100萬両。
試問，將不平等條約裏面嘅條文逐一推翻，將我們人民十九世紀受到嘅恥辱抹清，唔係我哋作為愛國愛港人士應該做嘅嘢咩？將香港收回祖國，要出動到鄧小平同志般嘅偉大政治家，唔係一件我同你可以做嘅事，不過攞番祖國嘅白銀，就係一件我同你都可以做嘅事。金手指今日呼籲，兩位港產嘅國家領導人，應該全力出擊去買實貨白銀，就算唔係為咗金手指篤過嘅120美元一盎斯目標價，都要為抹清不平等條約裏面嘅恥辱出力。希望佢哋真係咁愛國！
孫柏文