工廈炒風熾熱，搞到回報係咁跌，估唔到市場近期仲搵到超過10厘回報嘅成交，而且仲唔止一單㖭。
呢批有10厘以上回報嘅單位，全部喺火炭區，好似富騰工業中心一個中層約1萬呎單位，由同區用家以650萬買嚟作擴充之用，以工廈呎租6蚊計，若果出租回報有11厘。
而華樂工業中心實用約3863呎地廠，以400幾萬賣出，買家係區內廠家，兩手準備，先用作收租，一旦要擴充業務就收番自用，𠵱家華樂嘅地廠呎租10蚊，回報近12厘。
另外，同區又錄得投資者連環掃貨，先用206萬掃入豐利工業中心中層單位，面積3561方呎，市值租金每呎五個半；再用179萬買入威力工業中心約1835呎高層單位，可以租到9蚊呎，兩個單位回報都過10厘。
美聯火炭分行高級營業經理范明珊解釋，近排多咗逾10厘回報嘅工廈買賣，原因係租金升得快，但市場一般都係得7至9厘回報。
另外，利嘉閣測量師行經理蔡楚鳴話，葵涌力豐工業大廈地下D室，2400方呎，過去兩年6度轉手，由329萬一路炒上，去到最新嘅1098萬，而最新一次轉手，賣方8日執100萬離場。
電郵地址：[email protected]
