教宗本篤十六世在耶穌受難日開腔回應「猶大福音」，指斥猶大係「貪婪大話精」。身為教宗，當然要咁樣講啦，要羅馬教廷承認猶大福音嘅真確性，相信起碼要等多一個世紀，「猶大福音」喺未來幾十年，會係學術界與宗教界激烈爭辯嘅焦點。
西方學者有個好傳統，佢哋絕大部份係耶教徒，非天主教即基督教，人人讀過聖經，但係仍有胸襟辯論不同之耶教歷史問題，唔會視之為教徒之禁忌。我哋唐人學者又如何呢？古語有云，「漢人學得胡人語，走上城頭罵漢人」，現代唐人不時有此現象，左丁山當然唔係話我哋𠵱家學識英文就話中文唔掂，而係話不時見到一啲自少讀教會學校，終身為教徒之人，比較少批評自己國家嘅文化宗教，頂多係勸別人信教啫。但係某些中年以後先至信耶教嘅人，前半生鑽研中國文化，可以講得係國學精湛，唔知點解為咗避秦移民他國，改奉基督之後，竟會「大徹大悟」，覺今是而昨非，恨自己點解唔早幾十年信奉主耶穌，竟被破綻甚多嘅儒子所迷，於是向基督懺悔都嚟唔切，就痛數先賢之不足，講耶教文明及西方之優越。
儒家先賢當然並唔係一定啱晒，亦可以批評佢哋對西方認識未必足夠，但令人疑惑嘅係，呢啲學者過往幾十年來信主耶穌之前，明明白白都讀古書㗎，點解嗰陣唔識批評呢？唔通嗰陣係讀死書，要待主耶穌打救，先至腦袋開竅？
左丁山係細路之時，飽讀詩書之姨丈走難落嚟香港，住響石峽尾木屋，幾年後猛叫左丁山信教，去教堂聽道理。先父對佢講：「你平時對細路講吓《論語》，就好有做人道理啦，使乜聽人講耶穌！」姨丈話：「到教堂有牛奶麵粉派。」講完自己都面紅，以後絕口不再提。其實姨丈要養一家五口，攞啲教會牛奶奶粉，權宜之計啫。現在有人飽讀詩書，不為牛奶只為「神」，日日罵師傅輩，咁得閒不如去考證猶大是否忠義之士，重有益後世。