令小股民如癡如醉嘅中國人壽（2628）噚日派去年成績表，都好正，比前年賺多咗近三成，仲第一次有末期息派。加上舊年6月1日，楊超坐正做董事長後，國壽股價就係咁升，由舊年6月嘅$5.1，到噚日收市報$10.4，足足升咗成倍，難怪楊董笑到見牙唔見眼，仲同華華講，好鬼滿意班管理層同事嘅表現啦。
業績同股價都好，咁身價就梗係今時唔同往日喇，揀策略性投資者嘅條件都要提升吓。楊董用咗「談戀愛」嚟妙喻，話公司上市前後都有搵適合結婚（策略性投資者）對象，不過上市前少啲人識，上市後名氣大咗，門外多咗好多人排隊！有得揀就梗係慢慢揀到啱啦。
至於乜條件先合心水呢？楊超笑笑口話，起碼都要門當戶對，咁先可以各取所需，同埋配合公司未來發展。佢仲話，唔單止會「引入」具備技術、人才及資金嘅對象，亦都會主動啲「走出去」搵，只要合眼緣啱嘴形，對方係國產定老外都唔緊要喎，家吓已經有兩三個心水目標啦！
市場流傳，話其中一個對象就係建行，不過楊超就點都唔肯講太多，淨係話大戶人家就梗係好啲，又話唔排除以換股形式結合，總之有進一步消息，就會公告天下，正一皇帝女唔憂嫁面口，華華惟有等佢派帖啦！
李華華
讀者如有任何意見或報料，歡迎發送電至[email protected]。