今次推出《歡樂家庭組合》（FamilyFunStuff）已經係《模擬市民2》第5張資料片，再度將遊戲內容擴增，上一集《開店達人》人人都話難度高，確實考起唔少機壇老手，今集為咗適合一家大細玩，就無咁難玩，而且遊戲以兒童為對像，加入大量童話、奇幻風格傢俬，係一集與別不同《模擬市民》。
記者：許福合
喺《模擬市民2》中，每個人都會經歷不同時期，由幼童進入青年、成年到老年，當中會經歷一般人遇到嘅事情，好似上學、結婚生子等等，每次事件都會對角色性格行為互動，加上畫面全3D化，效果相當逼真，而且每隔一段時間，會有資料片推出，會將唔同系統或玩法補足，今集就專為家庭生活玩家而設。
享受家庭生活
喜愛玩《模擬市民2》嘅玩家，其中一個着迷之處，係可以有一大堆道具可設置，新資料片更喺這方面花心思，尤其要設計小孩嘅房間，就有更大空間發揮想像力，道具之中最過癮要數一個好像水母一樣的燈，放喺房內開燈時，光線會轉住射，就好似進入童話世界一樣，若然再加埋一張古代城堡風味床架，靚之餘重好有特色！
另外，介面內亦可找到主題式裝飾，可直接套用在房間或客廳，唔使自己慢慢設計。新一集重有個好玩之處，就係可以換「新衣」，不過呢件新衫並唔普通，非常前衞，如小孩可穿上美人魚裝與熊熊裝，成年人亦預備咗夏威夷衫，就好像開派對一樣！
60種新道具
除咗以上提到傢俬同裝備，資料片還有多種全新系列家具、服裝與裝飾品，適當配合裝配，可以令模擬市民娛樂指數比平常升得更快，另外一些特別服裝，如公主服效果就會更為明顯，道具之中，更可找到唔少奇怪裝備道具，數量多達60種，部份道具睇唔出有何作用，要玩家慢慢試。今集《歡樂家庭組合》亦加入好多家庭事件，幫助玩家提高分數，例如父母可以同小孩講故事、開派對。今集更為着重模擬市民之間關係，當模擬市民思念另一個人時，他思緒泡泡中會出現心心，若果同其他人關係欠佳，於縮圖內將會加上紅光，最後更可能變成仇人，所以要特別留意他們互動，搞好關係。
PROFILE
遊戲類型：SLG
對應機種：PC
遊玩人數：1人
關發商：ElectronicsArts
售價：$150
