自從兩鐵合併方案公布後，地鐵股價近期高企不下，雖然係咁，原來地鐵大部份管理層舊年都要減薪，介乎10萬至30萬元，只有行政總裁周松崗及財務總監梁國權有人工加。
當中又以周總裁加得最多，由前年嘅900萬元加至舊年990萬元，加幅一成，當中最大份係與表現掛鈎嘅花紅，由340萬元加到420萬元。
唔知將來兩鐵合併後，如果由周總裁坐正，份糧會唔會更進一步？
雖然幾好景，但地鐵主席錢果豐喺年報裏面話，地鐵舊年喺歐洲競投三個項目全軍盡墨，包括英國肯特郡鐵路綜合專營權及Thameslink/大北方專營權，以及喺斯堪的納維亞另一項專營權。
不過錢主席話，失敗乃成功之母，憑呢幾次投標過程中累積嘅經驗，相信可成功開拓當地市場。
周總裁亦講，公司今年喺英國仲會競投兩個項目，包括已通過投標資格預審嘅西南鐵路專營權及北倫敦鐵路專營權，睇吓今年可唔可以開齋？