去年來港上市嘅建行，今年首季氣勢如虹，一心要邁向國際化之路，奈何佢哋月初派出嘅首份全年成績表，冇驚喜之餘，仲俾一啲國際投行分析師，質疑部份財務披露不夠清晰。
建行作為首家登陸港交所嘅四大國有銀行，當然不敢怠慢，罕有地隔咗個幾禮拜後，喺噚日發表補充公告進一步解釋，同埋重申佢哋嘅信息披露絕對透明。咁又係，中資股隻隻升，係佢郁都唔郁，好冇面啫，點都要拆番掂佢。
分析師疑團之一，係建行舊年有效稅率降至29%嘅原因不明。公告話，內地稅務部門調高咗該行舊年計稅工資的稅前扣除總額，由此產生嘅所得稅費用，相應由前年嘅39.06億元人民幣（下同），降至去年度嘅4.03億元。
至於被指來源不清嘅13億元滙兌損失，公告就話建行出現外滙交易淨損失，係受人民幣升值因素影響，佢哋已經通過購買外滙衍生工具規避風險。嗱，建行對外界評論都算高度重視，至於分析員對補充解釋收唔收貨就好難講喇。