商廈市道好景，吸引業主趁勢放售手上單位套利，上環昌生商業大廈大業主就攞咗8層出嚟，搵美聯幫手賣，每呎2200蚊起。
美聯香港商業部高級營業經理周永亨表示，嗰8層喺4至6樓同8至12樓，每層約1974方呎，有獨立冷氣同洗手間。單位以交吉方式出售，賣價比同區同類單位平約兩成。
昌生商業大廈樓齡12年，近上環地鐵站，地下係商舖，1至23樓為寫字樓。聽講係由老牌家族昌生物業興建，之前已賣咗啲地舖同幾層寫字樓，今次就算再賣8層，仍揸超過一半業權。
講開上環區，中原香港商業部助理營業董事廖漢威報料，一家租用中環非核心商廈嘅公司，有見喺沙士期間簽落嘅租約快屆滿，所以決定自置辦公室，用736萬買咗上環俊和商業中心中層全層，約2725方呎，每呎2701蚊。