大市果然升到你唔信，假後復市，又大升逾200點。國企股仲犀利，H指更大升246點，升幅3.6%，好似江西銅業（358），高收7.80元，大升12.2%，紫金礦業（2899）亦升12.2%，中國鋁業（2600）升7%。鋼鐵股全面造好，鞍鋼（347）升5.3%，馬鋼（323）升4.8%，重鋼（1053）升3.5%；仲有隻中國特鋼（2889），高開1.91元後，一路掃到上2.40元收市，大升28.3%。好似呢啲百花齊放嘅大升市，一年只得一兩次，機會要好好把握。
噚日先話過，基金同大戶會趁冇窩輪到期嘅「真空期」做工夫，挾個市上去，睇噚日個勢，佢哋真係會咁做，未來1個月，個市真係會旺到七彩。
講番鋼鐵股，隻隻呢輪都起到飛起，剩低隻首長國際（697）幾乎仲係原地踏步，今個禮拜四派成績表，照計會見得人，看來股價擺脫悶局之期已不遠。
3月中，首國股價曾見0.72元，噚日都只係0.73元。同期間，鞍鋼由6元升到8.25元高價，升幅37.5%；馬鋼由2.60元升到3.35元，升幅28.8%；重鋼由2.30元升到2.95元，升幅28.2%；中國特鋼由1.50元升到2.425元，升幅更達61%。
注資活動會加速進行
首國「晒士」雖然係細，但大圍大升市，佢遲早會跟番上，升番20%到30%，股價就可以去到0.90元到1元水平。首國有條件追落後，業績亦應該可以提供動力。
05年度（12月年結）的上半年，首國賺3.35億元，大升2.2倍，已超過04年全年的2.79億元，全年預測5.75億元，每股盈利0.12元，以PE8倍計，股價已可企穩0.96元。
首國噚日呆企，可能同首鋼今年首季盈利大跌有關，但首國係首鋼刻意要「關照」嘅子公司，在現時內地鋼鐵業要做大做強之際，首國的新一波注資行動應該會加速進行，上一次注入秦皇島板材公司的PE係2倍多，進一步的低PE注資，對首國會有刺激。
首國上周升破0.72元的上升三角形阻力，噚日後抽，一升破0.74元，升勢即可確認，短線的量度上升目標係0.89元。
郭兆誠