恒指大升208點（1.2%），紅指大升62點（2.6%），H指大升246點（3.6%）。當然好多人開心到彈起，但唔係個個都身家漲咗。原地踏步同下跌嘅股份，夾埋多過上升股份1成。
喺胡主席訪問美國期間，紅籌與H股感覺會繼續良好。但升得太急嘅可能會唞唞氣，輪到啲蝸步股份行番快啲。
中銀C輪3590：中銀（2388）算係升得慢啲恒指成份股，收16.45元，只係爬高2格，好大機會跟埋中資股嗰便跑番快啲。市場氣氛利紅籌、H股，加上人行搞緊上市，稍後中銀會有表演機會。
中銀C輪搵隻嚟炒，諗3590，10月中夠鐘，輪價1.01元，溢價2.7%，槓桿率16.3倍（有效8.7倍），引伸波幅22.9%。
根據公式計算，中銀昨日升10仙，3590理論升幅係5.2仙，但隻輪昨日完全冇郁到，因此更加抵買。
中電信C輪9886：4隻國內電訊股中，只有中電信（728）唔係點生猛，收2.85元，直頭似蝸牛上樹，升得1格，有追落後條件。
中電信C輪搵隻嚟炒，諗9886，7月中夠鐘，輪價22.9仙，溢價0.3%，槓桿率12.5倍（有效9倍），引伸波幅24%。想波幅大啲，向9927埋手，呢隻更易買賣。
章盛