多得「飯tastic」的鋪天蓋地密集式宣傳，霎時間，香港人開始識得對傳統漢堡要求多啲、刁鑽啲，漢堡包再唔係兩塊芝麻包、牛肉生菜夾青瓜咁簡單，正如今次推介嘅美式漢堡包，貴就貴啲，不過漢堡包入面夾嘅係貴價和牛、龍蝦、鴕鳥肉、軟殼蟹，所以話，今時今日嘅漢堡包已經全面升級，絕對唔止係當年4個半銀錢嘅老麥漢堡咁簡單。
記者：陳慧茵
攝影：周旭文
Model：Ken@Salvador
提前推出食住條水
純粹個人觀感，一向對美式餐廳好感不大，炸魚、薯條、漢堡……無嚟新意兼又滯又膩，大大塊肉對於唔係食肉獸嘅人嚟講簡直受罪，最慘係肉質多數乾身嚡口，食肉如嚼蠟，所以知道有和牛漢堡登場，雙眼即時發光。全權負責設計新式漢堡的馬哥孛羅酒店總廚HeinzOertli笑住話：「食嚟食去都係普通牛肉、雞肉漢堡真係幾悶㗎，所以每年7至8月GRIPPS都會有特色漢堡，上年以炭燒扒類為主，今年索性盡興啲用矜貴和牛、龍蝦做餡料。」
鑑於7至8月大熱天時食客對食肉興趣驟減，所以今年提早4至5月開鑼，亦叫做食到「飯tastic」水尾餘威。
大廚推介墨西哥包
麥記都識飯tastic配菠蘿片或粟米杯，酒店級數當然更加細心，GRIPPS每款漢堡都會按濃淡程度配合不同沙律，例如濃味的煎鴨肝伴鴕鳥肉漢堡包會配蔬菜沙律；淡味嘅扒鮮蝦餅漢堡就會配醬汁沙律，酒店長期熱賣嘅印式素菜烤餅漢堡仲有青BB嘅莧菜沙律配㖭！
不過十隻手指有長短，多款漢堡中，總廚最愛嘅係墨西哥式漢堡熱狗：「今年第一次有咁多款唔同口味嘅漢堡包畀客人揀，不過惟獨呢款我用咗長身熱狗包，而且面層辣肉腸CHORIZO仲係我食過最好味嘅心水推介！」
茫無頭緒或羊群心理者，不妨試試總廚推介。
「包」有得分
4款自選漢堡包各有特色，勝在迎合花心又多心嘅香港人。
1.全麥漢堡包：較硬身粗糙，勝在高纖有益。
2.乾茄香草漢堡包：帶番茄香味，味道最突出。
3.正版芝麻漢堡包：傳統款式，帶芝麻鹹香。
4.香草漢堡包：粒粒香草在麵包上清晰可見，味道清淡。
龍蝦和牛漢堡包$220
日本澀谷ZipZap餐廳的和牛漢堡做到街知巷聞，呢度加埋波士頓龍蝦肉，漢堡包即時跳升至鑽石級數，和牛咬落油潤可口，伴以creamy芝士白汁及鮮嫩龍蝦，yummy！
煎鴨肝伴鴕鳥肉漢堡包$175
由於新鮮鵝肝禁運，酒店不諱言用嘅係雪藏鴨肝，好彩有瘦身鴕鳥肉撐場，混入少量澳洲肥牛的鴕鳥扒入口更Juicy，配質感豐厚的鴨肝，口感啱啱好。
墨西哥式漢堡熱狗$135
總廚心水推介的辣肉腸帶濃重鹹香，乾身微辣，加埋澳洲瘦身牛肉扒，味道不俗，特別在配菜亦一絲不苟，有燒粟米之餘，粟米片仲可以點牛油果醬同食，比一般薯條配搭有新意。
其他必試漢堡
除咗左列新出漢堡，餐廳仲有多款特色漢堡長賣長有，過咗推廣期都唔怕無得揀。
印式素菜烤餅漢堡$125
長青款式，以豆、雜菜、薯茸脆炸過的烤餅一啲都唔寡口且勁有口感，加埋搶眼豆腐夠晒營養，青BB嘅莧菜沙律外形趕客，其實味道極佳。
羊扒蘑菇漢堡$135
豬牛以外，羊扒一樣可以整成惹味漢堡，配以紅酒醬汁，配菜有炒香的蘑菇、半乾番茄及青椒，同平時鋸扒分別只在於多層麵包。
食客幾句
餐廳背後係……
話GRIPPS係欖球餐廳亦不為過，入口處有大型櫥櫃放置大量欖球用品，牆上掛滿球員簽名球衣、海報，原來酒店係香港七人欖球賽球員指定住宿酒店，順理成章，餐廳亦以欖球做主題，不過來港球員太大棚人，所以只會於functionroom開餐，廚師們對佢哋嘅評語係：「Eatlikeacow！」，睇怕一人每餐起碼食兩至三個漢堡！
GRIPPSAmericanBarandRestaurant（醉翁軒）
電話：21133902
地址：尖沙嘴海港城馬哥孛羅香港酒店6樓
營業時間：12nn-1am（星期日11:30am-1am）
座位：120個
供應期：即日至5月31日（印式蔬菜漢堡及羊扒漢堡除外）
