話就話放咗４日長假，但小初仍然覺得好似瞓極都唔夠，不過今日有番股票炒，成個人即刻精神晒。
經紀陳叫小初留意兩隻股票，一隻係浩基（628），另一隻係漢寶（228），兩隻都係最近搞變身後復牌，復牌之後一路係咁升。
經紀陳話，唔好以為兩隻股仔升咗咁多就算，聽講人哋搞緊大茶飯，好戲尚在後頭。
浩基原本做開木材貿易同安裝防火門業務，變身唔夠1個星期，股價升咗1倍有多，假期前收2.25元。雖然公布交易之時，已經有芬佬在1元接咗貨，現價睇落風險好大，但浩基股價炒上，一直都由芬佬主導，如果佢哋肯玩，則未升完。
至於漢寶升勢仲勁，由在香港搞酒樓走到去蒙古搞煤礦，野心一啲都唔細，股價升幅比起浩基更大，漢寶遲浩基一日復牌，升幅一樣過倍，上周四收報2.65元。
由於漢寶街貨同浩基一樣咁歸邊，有高人指點，自然想升就升。
慕容小初