BB出世之後，父母乜嘢都以佢為首，不過佢哋唔理三七廿一乜都喊咗先算，真係好難服侍，同時亦為父母增添不少難題。尤其是在0至12個月大的時候就最難湊，喊又唔知為乜、夜麻麻又唔肯瞓、遇正佢哋嘔奶、便秘或出牙仔……實在有好多學問。要搵出一套標準答案幾乎等於無可能，不如又睇吓唔同父母又有咩良策應付？
記者：梁彩燕
攝影：周旭文
Model：Peggy（Salvador）、JeffLoo
好多父母都擔心自己寶貝成日掛住玩、瞓咗覺唔肯食嘢或者食唔飽，會唔夠營養，想盡辦法要BB食到夠，但兒科醫生陳以誠則叫父母毋須擔心，「每幾個鐘要食一次奶係大人嘅標準嚟啫，BB掛住瞓覺唔食奶唔係大問題，唔使緊張，BB唔肯食嘢亦唔使『監』佢哋食，隨其自然得啦。而且BB每日飲奶份量應以全日計算，而唔係每次計，更毋須用針管滴畀佢飲，BB係要啜先滿足、先舒服㗎！」
陳伶俐：「細心聽喊聲」
已為兩名兒子母親的陳伶俐，回想第一胎生林肯時，未夠6個月大的時候最膽戰心驚：「佢會突然喊，我又唔知佢想表達咩嘢，當時好驚。BB好多時會『多風』引致肚仔痛，咪幫佢按摩吓囉。其實都係見招拆招，最緊要有心機，佢猛咁喊就細心啲觀察，真係會次次唔同㗎！唔好求其拍兩拍就算！」
楊婉儀：「同佢一齊喊」
「頭個幾月至係最難湊，佢喊唔知係因為肚餓、要換片定係邊度唔舒服，當然我都束手無策，甚至同佢一齊喊！有一段時期BB又唔肯瞓，瞓着一陣一放低又喊，我同先生就輪流抱𠱁佢瞓，有時要四、五點先真正瞓着。」Winnie有時會用拍手掌、唱兒歌嘅方法引開BB注意力，真係乜方法都要試。
真實個案：媽咪Queenie和囡囡愉晴
惡搞一：放落床即喊
過來人解救有法：放米袋提升安全感
「出院返屋企到一個幾月時，每隔兩個鐘就要餵一次奶，每次放低佢就會喊。到兩、三個月大的時候，聽屋企老人家講，等佢瞓得咁上下冧，就放落床，響佢側邊放個好似小咕𠱸咁大的米袋，開少少收音機或音樂，佢就會多啲安全感，唔會咁易醒。」
惡搞二：牙痕咬自己
過來人解救有法：牙膠先雪一陣
「愉晴4個幾月已經出牙仔，起初整啲米糊畀佢食，後來則餵香蕉茸、蘋果茸或蘿蔔泥糊，到八、九個月大就煲魚湯或魚粥。佢一牙痕就會咬自己，有時因為雙手污糟搞到肚屙。我都會畀佢咬牙膠，但用之前必定會用熱水烚過，烚完放入雪櫃雪一陣先畀佢咬，咁先起到止牙痕作用。」
真實個案：媽咪賴太和囝囝健健
惡搞三：無故發脾氣
過來人解救有法：忍心由佢喊
「𠵱家健健15個月大，間唔中會脾氣暴躁，如果係小事我哋都會遷就吓佢，佢好硬頸，有時佢會狂喊，我哋唔會理佢，由得佢自己喊完就無事，但有時佢會自己屈服。」
真實個案：媽咪Joko和囝囝Jeff
惡搞四：乜都放入口
過來人解救有法：清水抹玩具
「Jeff成日會周圍爬，好好奇，只要響佢視線範圍之內、又可以執到嘅嘢就以為可以放入口食。我哋會盡量收埋體積細細嘅嘢，新玩具就會先消毒，平時怕影響佢抵抗力，一般清潔玩具就只用清水。」
真實個案：媽咪Ivy和囡囡可程
惡搞五：發夢又喊又笑
過來人解救有法：夜晚唔好癲
「可程有時日頭遇到難忘事或者好開心，成晚都會發番差唔多情境嘅夢，有時喊有時又會笑。我都會由得佢（日頭俾佢玩），始終佢都需要刺激㗎嘛！而且咁細個仲未識咩係發噩夢，所以唔會阻止佢日頭玩得癲，夜晚就免啦。」
惡搞六：便秘唔上唔落
過來人解救有法：多飲水
「可程小時候試過連續4、5日屙粒粒硬大便，見佢屙得好辛苦，試過屙到喊，又試過屙血，仲有一次唔上唔落，要即時帶去醫生度，姑娘幫佢人手通便㖭！後來我就畀佢飲多啲水、或在鮮奶度落啲果糖，就慢慢改善番。」
真實個案：爸爸阿峯和囝囝立翹
惡搞七：返屋企唔自在
過來人解救有法：公園散心
「立翹𠵱家10個月大，每逢出街佢就乖啲，返到屋企好似周身唔自在咁，有時仲會發𤷪𤺧。我同太太冇乜嘢做每日都會帶佢落公園行吓，有啲似放狗！哈！同佢行吓公園落吓街，佢已經好開心。」
惡搞八：嚴重嘔奶
過來人解救有法：保持耐性繼續餵
「立翹嘔到8個月大仲會嘔，飲一樽奶嘔番半樽，掃咗風都無效，搞到大人細路都要換衫換床單，直至開始食固體食物至唔嘔。醫生話只要佢係一路有成長就問題不大，咪惟有嘔完又餵餵完又嘔咁囉！」
