話咁快歐冠盃經已殺入準決賽階段，今晚頭輪先上演AC米蘭大戰巴塞隆拿。今季兩隊攻力同樣強勁，究竟邊隊能夠喺首回合取得優勢？照秤捧番有主場之利嘅AC米蘭，好似着數啲！
點解咁講呢？事關經已取得過6次歐聯錦標嘅AC米蘭，今季主場氣勢凌厲，喺過去24次主場出戰取得22勝2和嘅紀錄，不敗之餘勝出率超出九成。另外AC米蘭主場對住西班牙球隊，成績亦相當唔錯，17戰當中，只係輸咗4場，得勝率更加係超過一半。再講，AC主場對住強隊真係有殺冇賠，例如聯賽先後贏祖記及國米，而歐冠盃亦喺16強同8強分別擊敗拜仁同黑馬里昂，所以咪當聖西路嘅主場威力無料到！
巴塞作客未如理想
睇番巴塞作客嘅表現，就明顯較為輸蝕，近3場作客都贏唔到波，對住西甲嘅護級分子馬拉加，以及歐聯8強對賓菲加，更加係1球都入唔到。今次面對主場特醒嘅AC，肯定唔易應付。
雖然扁桃腺發炎嘅恩沙基今仗未必能夠為AC披甲上陣，但巴塞同樣有進攻主力美斯缺陣，雙方可以話係無咩着數蝕底。AC對上一次在歐聯主場對住巴塞，都能夠以1:0小勝。種種因素加埋，今仗小妹撐AC主勝，絕對唔任性！
有線球彩台主持RITA