頂唔順啦！真係好眼寃！孫柏文隻金手指一向以來都係攞嚟篤爆啲謬論。不過今次真係要攞出嚟篤爆一個好肉酸嘅着衫方法。我突然想講fashion呢樣嘢嘅原因，係因為呢幾日長假期，為求討好一個女仔，就順應要求去到銅鑼灣逛一逛。
平時孫柏文一條友嘅時候，銅鑼灣係一個唔小心就會撞倒人嘅地方，仲要唔係見面嗰種「撞倒」，而係會令到對方跌落地嗰種「撞倒」。咁「撞倒」啲嬸嬸都仲算ok，因為佢哋知道買平嘢（bargainhunting）係一種觸碰性運動（contactsport），所以就算不幸倒地，嬸嬸們多數都唔會察覺到，最多只會慨歎「食位食得唔好」，跟住就會返屋企，檢討點解會俾人食咗個位。不過，如果撞倒嘅係啲靚妹，就大鑊喇，佢哋會斜視你，跟住仲要個嘴藐藐吓，直頭令到我好似有時光倒流、重返校園，對住女同學嘅感覺。所以我都好少去，不過今次諗住為咗個女仔就破例一次。
褲有由來 靚仔咪扮In
點知道，一落到銅鑼灣發現好多靚仔着褲，個褲襠好似有好多空位。初頭仲估呢期年輕人興用硬物互擊下體，繼而令到下體因受創而瘋狂地膨脹，所以着啲褲襠有好多空位嘅褲。不過再睇真啲，佢哋嘅褲襠好似有好多空位，係因為佢哋冇好好咁抽高條褲。搞到暴露咗半條底褲出嚟，而個褲襠就有好多空位，同埋褲腳就拖住地咁行。呢個着衫方法，孫柏文上世紀末喺花旗國讀書嘅時候，都見過有同學咁樣着，當時，我第一個反應係心諗：「呢位仁兄，去廁所嘅時候，咪要好小心？」不過，喺孫柏文讀嘅人煙稀薄嘅大學當中，啲廁所地板都仲算亁淨，濕嘅地方都只佔廁所面積好細嘅地方，絕對可以避。不過，見到銅鑼灣啲靚仔嘅褲腳，我就好擔心，因為只要公廁裏面負責清潔嘅叔叔，好勤力咁拖地，不過用來用去都係同一桶水，咁咪會好污糟囉？
讀書嗰陣時，我最後都係忍唔住，問咗個露半條底褲嘅黑人同學，點解要咁樣着褲。佢話：「因為花旗國裏面，每五個成年男性黑人，就有一個坐緊監。咁監服就一定唔係度身訂做，所以一定會有出入。而監獄驚人自殺，所以唔畀人有腰帶，所以坐監嘅人，好多時候條褲抽唔高。我咁樣着褲嘅原因，係因為我想精神支持坐緊監兄弟，同以服飾抗議司法制度存有的種
白銀走勢 有危不驚
講起呢期潮流，孫柏文就要好似Batman咁變身，變成「紙幣狂魔」嘅死對頭「白銀文」。噚日，白銀好輕易咁升穿13美元一盎斯，睇走勢，真係有啲危。不過，最後都係嗰一句，千萬要記得孫柏文曾經講過，隨時都係入市買實貨白銀嘅好時機，唔信?睇吓個圖表就明啦。
孫柏文