今周中又再次聚焦歐冠盃賽事，來到四強階段真係無弱戲碼；今晚場AC米蘭對巴塞隆拿當然係大戰啦；但聽晚阿仙奴主場出戰維拉利爾，雖然賽前真係無太多人估到佢哋可以打入四強，但戲碼絕對唔弱㗎，球迷有電視直播的確有福！
阿仙奴近期主場的確唔講得笑，已經連續7場未輸過，5勝2和；手下敗將仲要有皇家馬德里同祖雲達斯，但係聽晚對維拉利爾，盤口開到讓半球/一球，讓到咁多，莊家似乎對「兵工廠」充滿信心。不過，維拉利爾賽前喺聯賽已經收起晒幾名主力球員，留待明晚之戰摶殺，2隊實力距離真係咁大？似乎又唔係差咁遠，上盤要贏夠2球先至贏晒成個盤；以近兩屆8場四強戰，贏對手2球只得3場，捧阿仙奴贏晒成個上盤，有難度。
其實周中仲有荷甲聯附加賽，好似阿積士就會硬拼飛燕諾，戲碼唔差。不過，收到風三色台就唔會有附加賽直播，有得賭、冇得睇。
文：戰鬥員A