對酷愛打機嘅人嚟講，尤其係家用機每年喺呢兩個月都算幾難捱吓，事關正值日本開學冇咩大作會喺呢段時間發售，頂多都係啲二線貨或者美少女Game，想搵隻筍嘢嚟怒煲都唔係咁易。幸好全球機迷昅到實嘅《大神》終於出爐，咪睇佢揸住隻狗唔知搞乜，其實佢係玩盡日本傳統神話故事，再加上只此一家嘅超靚水墨畫風同刺激玩法，睇漏眼就真係走寶！
文：陳福榮
起初《大神》發表嗰陣，除咗一匹狼做主角令人印象深刻外，仲有水墨畫風格，無論角色、建築物甚至風景等均充滿毛筆筆觸，因為好難想像遊戲機可以模擬得咁真實，更勁嘅係佢𠵱家出喺PS2咋。亦因為有咗毛筆元素，佢設計咗方便解謎嘅畫筆系統，好似用嚟斬樹劈石嘅「一閃」、補橋築路嘅「畫龍」甚至畫個太陽出嚟等等，總共有十三種會喺遊戲進行途中逐一取得，因此用新畫筆嚟Unlock番初段去過嘅地方亦係意料之內。如果發現前無去路，九成九都要靠支筆幫你開路㗎喇。
白狼升格做大神
堅持使用百分百和風設計，《大神》唔單止喺畫面度落重功夫令人讚歎不已，古仔就直頭係同你玩「東洋的神秘」。話說神話時代嘅日本，眾所周知伊邪那岐為咗保護女友免得做八岐大蛇午餐，於是單人匹馬走去做救世主，苦戰下幸得一白狼幫拖先至隊冧八岐大蛇，後世為咗紀念白狼捨身成仁，於是幫佢起咗個石像。多年後，有條友唔生性解開大蛇封印，神祇之一開耶姬就施法將白狼升級做神，就係今次遊戲嘅主角天照大神，要佢借助三神器同其他人嘅力量再一次封住大蛇。應該係製作人擺明玩嘢嘅關係，遊戲中眾神只會講神話，如果唔睇字幕你真係冇可能聽到佢哋噏乜，認真搞鬼。
連大神都識一閃
比起其他廠商，CAPCOM最出名當然係《鬼武者》嗰種3D動感戰鬥，打得燦爛講求節奏感呢點從來都冇變，到𠵱家《大神》更係一脈相承兼有進化。由於《大神》係玩三神器，有留意開《拳王》古仔設定都知係「鏡」、「劍」同「勾玉」，起初天照只係有一定攻擊距離嘅「鏡」，經過劇情發展會拎埋「劍」同「勾玉」，唔使講「劍」當然係破壞力最大而「勾玉」就最弱雞啦。另外佢亦好照顧班Fans，照樣有大家熟悉嘅「一閃」，只要配合得好，想快速解決群敵都算幾易。與此同時玩家亦可在武館之類地方學新招，例如側閃迴躲或者新必殺技等，用嚟對付後段較屈機嘅強敵。
製作人來頭猛
或者一般人可能會俾《大神》呢種咁獨特嘅畫風吸引到，其實整佢出嚟嗰位神谷英樹絕對唔嘢少，縱使入行只得十年但備受外國遊戲人大讚！唔計銷量乃歷代之冠嘅《Bio2》，成名作仲有《DevilMayCry》同《ViewtifulJoe》，前者係整緊《Bio4》時因為愈撚愈正，終於自成一派變成SpinOff，至於《VJ》就更加係被炒至斷貨嘅稀有GC佳作，個個鬼佬玩過都豎指大讚。《大神》響舊年E3橫掃全場，好多媒體都推舉佢做最佳動作遊戲，獲獎無數，唔係咁堅嘅話《Fami通》又點會畀佢39分。
PROFILE
遊戲類型：ACT
對應機種：PS2
遊玩人數：1人
開發商：CAPCOM
行貨售價：$368
(c)CloverStudioCo.,Ltd.AllRightsReserved.
