港股升破16000大關後，一口氣上衝500多點，才出現調整，一日小回、一日大跌，但上周四長假前又再回升，市底真係好強，唔排除上周三的低位16260係今次微型調整嘅底，若升破16535的前高位，升勢再現，短線好快會見16800，下個月有機會上衝17500大關。
基金同大戶今次都幾齊心合力，由於4月中同5月中的一段時間，冇乜大「晒士」嘅大藍籌窩輪到期，基金同大戶好有可能會趁呢一個「真空期」做工夫，挾個市上去，到高位又再發一大批窩輪搵銀，如果呢個推想成立，未來1個月個市將會旺到七彩。
內地地產股炒風一浪接一浪，落後股亦開始蠢動，有大半隻內地地產股概念嘅莊士機構（367）（持有莊士中國（298）60.1%權益），假前終於發力，搶上0.78元高收，成交更大增到2485萬股，金額1863萬元，係05年1月以來嘅高紀錄。
每股淨值達1.93元
過去1年，內地地產股風起雲湧，唔少嘅升幅由1個開至幾個開不等，但莊士就大落後，1年來股價都係在0.52元至0.72元間上落，完全冇大郁過，上周四以大成交而突破徘徊區阻力，照度上去，第一個站目標係0.92元。
大戶收集咗咁耐，正式發動攻勢，升20至30%，當然唔會心滿意足，單係睇莊士每股資產淨值已經有1.93元，打個6折，股價都起碼可見1.15元。
莊士持有本港投資物業逾40萬方呎，提供穩定的租金收入（每年約1億元），而主力在中國發展地產嘅莊中，經多年耕耘，已開始進入收成期，以公司嘅「晒士」而言，莊中的土地儲備可說極為豐厚，分別位於廣東省之廣州、東莞及惠州，湖南省的長沙及四川省的成都，將於未來4至5年分階段落成，提供可觀售樓收益。
基金同大行追捧內地地產股，由大到小，莊中同莊士這一類未被發掘的寶藏，相信會成為下一浪嘅目標。
莊中現時正在供股，聞說供股後將會有連串大動作，家吓買定莊士，等收割可也。
郭兆誠