假後港股復市，國內金融股料受抬捧。假期內QDII落實新聞，對佢哋有刺激作用。知名度高嘅國內金融股，最有資格大領風騷。
保險股本來最正，但近期升勢唔細，銀行股可能會更猛。吼建行（939）同交行（3328）相關C輪，比較着數。
建行C輪2293：建行C輪正路揀2293。隻輪8月初夠鐘，輪價43.5仙，溢價3.5%，槓桿率7.9倍（有效5.9倍），引伸波幅32.4%。隻輪由6個交易日前最高價64仙碌到最近最低價39.5仙，跟正股彈番1半失地，都見52仙，有兩分錢利潤可執。
交行C輪2292：交行C輪正路之選係2292。隻輪7月中到期，輪價49仙，溢價1.6%，槓桿率9.8倍（有效7.2倍），引伸波幅28.5%。隻輪2月尾高位92仙，正股技術反彈，隻輪彈番上去，大把水位。
滙控C輪9535：憧憬QDII為國內金融股帶來新氣象，亦可留意滙控C輪。國內有錢同胞，個個都識滙控（005）。滙控C輪搏殺之選係9535，7月初夠鐘，輪價36仙，溢價1.6%，槓桿率36.5倍（有效21.4倍），引伸波幅11.7%。滙控郁得幾郁，揸隻輪贏到笑。
章盛