收到五月號嘅NationalGeographic，封面故事係TheJudasGospel（猶大福音），睇落認真有味。前幾日睇《蘋果》評論版李怡專欄講民族英雄，提到內地電視為適合當前政治需要，捧施琅為民族英雄，咁樣吳三桂帶清兵入關，統一國家，算唔算民族英雄呢。左丁山記得以前有內地文章講岳飛，認為岳飛破壞民族和諧（漢人打金人），即唔算係民族英雄。
歷史為政治服務之時，乜嘢歷史定論都可以翻轉，中小學教科書統統要重寫，每隔五年改一次，或等到新國家領導人上台就改一次，好適合時代需要噃。講番「猶大福音」，可以改寫歷史，但並非為政治服務，而係一千七百年前嘅歷史文稿，重見天日，《國家地理雜誌》與一家歷史機構贊助，邀請專家將古埃及嘅紙莎草紙（Papyrus）原稿恢復原狀，翻譯成為英文（原文係希臘字母拼成之埃及語言，叫做Coptic，二千年前之埃及古語），公諸於世。
「猶大福音」必然引起天主教會大爭論，教會素來視猶大為出賣耶穌嘅千古罪人，但猶大福音記載，係耶穌睇重猶大，指示猶大將佢犧牲，成就神聖事業，神體自人體脫離。猶大後來將耶穌交畀羅馬人，收咗一啲銀幣之後成為大叛徒，內情只有佢與一班密友知道。咁講法，猶大在耶穌眼中係忠嘅，佢早已預知猶大會受後世唾罵。
發現猶大福音至到內容面世，歷時二十餘年，過程曲折，好似睇《達文西密碼》，十分過癮，天主教會專家曾罵《達文西密碼》歪曲歷史，憑空創作，但猶大福音之出現，令人感到《達文西密碼》之內容又未必完全係老作喎。以後幾年，相信好多西方專家會為此辯論不休，如果猶大能夠得到完全「平反」，基督教會歷史要改寫咯，唔淨止羅素挑戰耶穌與無花果的故事咁簡單。