一月先重返利物浦嘅科拿，近期表現鹹魚翻生，最近3場聯賽場場有波入，而且次次「首球」，真係帶挈唔少捧場客；3次首球賠率加埋有17倍幾，科拿躉呢舖都算本利歸還喇。
今年31歲嘅科拿，九十年代初成名於利物浦，直至○一年被賣走。喺列斯聯同曼城度過5個失望球季後，科拿今年初免費回歸紅軍，呢位累積逾百個聯賽入球嘅前鋒，連續3場聯賽有波入唔係新聞，但連續3次「首球」就係第1次。
利物浦星期日全靠呢位「回頭草」一箭定江山，作客小勝布力般，聯賽累積6連勝。季尾約滿嘅科拿，似乎着翻件利物浦波衫特別醒神；如果呢一刻要領隊賓尼迪斯決定邊個留低，科拿同前晚2次單刀都望門興歎嘅施斯比較，你估賓帥又會點揀呢？最近，布力般同保頓都想打科拿主意，唔通真係「瘦田無人耕，耕開有人爭」？