現年二十三歲的陳苑淇（Jolie），小時候生成一副「男人婆」模樣，加上鴛鴦眼皮，高身材，曾為此而自卑。讀幼稚園時，一次向老師自薦演芭蕾舞劇裏的小天使，竟遭拒絕，老師還提議她改演巨人，這小小打擊為Jolie留下難忘的童年陰影。
陳苑淇出身於小康之家，童年生活稱心如意，父母視她如掌上明珠，經常帶她出國旅遊，更為她拍下數百張童年照；六歲那年，母親再誕下弟弟，Jolie一樣地位不變，兩姊弟亦從不爭寵。
冇人讚靚女
女孩子都是愛美的，Jolie亦不例外，她小時候曾因不漂亮而自卑，為童年記憶留下一抹陰影。Jolie說：「我細個生得好醜樣，又大份，隻眼仲一邊單眼皮、一邊雙眼皮，所以從來冇人讚我靚，只會好婉轉咁話我可愛咋！」
讀幼稚園的時候，Jolie嘗到了人生第一個打擊，她說：「我最唔開心嘅經歷係讀幼稚園嗰陣，當時老師話要搵個識跳芭蕾舞嘅同學做小天使，於是我就舉手啦，點知老師話我太高，唔可以做小天使，仲叫我不如做巨人，搞到我唔開心咗好耐，嗰時仲覺得原來高係唔好㗎。」
細佬學鸚鵡
Jolie較弟弟年長六歲，她自言很慶幸父母從沒有重男輕女，還笑說：「我同細佬嘅感情真係好好，從來冇話打交嘈交；雖然我哋年紀相差六年，但好多時都係佢蝦番我轉頭，佢好鍾意跟我口水尾學我講嘢，次次我都唔夠佢嚟，仲俾佢激到喊，真係好鬼冇用！」
採訪：駱華齡
部份圖片提供：陳苑淇
