GlobalSources喺博覽館搞嘅電子展同時裝展今日結束，呢兩個除咗係佢哋喺香港嘅處女展之外，仲係博覽館第一次用晒十個展場嘅大騷，所以雙方都鬼咁緊張，事前宣傳做到足，淨係飯局都搞咗三次，仲次次都有新花款，又送機鐵飛，又安排專車接送，好大陣仗。
每次搞宣傳，GS嘅阿頭都讚到個場天上有地下無，地利好又夠大……。終於，有個國內記者唔知真懵定假儍，大大聲咁問GS行政總裁韓禮士：「你哋係咪有份投資個場㗎？」
據華華所知，GS今次嘅宣傳費用咗200萬美元左右，一年前已經開始部署，除咗喺慣常嘅網站及行業雜誌賣廣告外，仲特登喺的士同商廈內嘅LCD電視賣廣告，又請嚟唔少國內同台灣嘅傳媒到港，好彩預算都做得唔錯，總算冇使大條數。