跳水王子田亮最新自傳《最亮的十米》已經推出，前日佢仲特別喺黑龍江嘅大慶舉行簽售會，雖然天氣好凍，但大批fans依然一早到場，搞到簽售會未開始，會場外已經水洩不通，主辦單位為安全計，特別加派保安到場維持秩序。雖然會場迫滿人群，但情況都未致失控，事關田亮班fans話唔想失禮偶像，所以個個都好自律好守規矩，只係攞住紙牌歡呼吶喊。
買唔到書狂噓
田亮一出現，即刻使出佢嘅招牌笑容，現場fans當然開心到拍爛手掌，有啲仲激動到流眼淚，認真誇張。由於反應太熱烈，簽售會時間要一再延長，大會預備嗰二千本自傳全部賣清。不過，有好多人因為一早到場都買唔到而相當不滿，喺田亮離開嗰陣竟然係咁噓，勢估唔到田亮今次簽售會喺掌聲開始，噓聲中結束。