今年嘅香港電影金像獎頒獎禮雖然已經完咗，但馮仁昭聽講金像獎董事局埋單計數，今年製作頒獎禮差唔多蝕咗成百萬，上年因為有政府贊助成二百萬，所以就封咗蝕本門。
港府怕怕
但今年情況唔同，呢啲就拜金像獎董事局嘅文雋所賜，如果佢唔係上年衰多口話金像獎係私人party，外邊人唔會鬧到七彩，搞到今年政府都唔敢再支持呢個私人party。
馮仁昭有時覺得金像獎呢班人做嘢都幾迂腐，明知有啲人做到出事，仲要死撐住，難怪香港電影圈愈做愈失敗啦！文雋呢兩年做金像獎主席都係受到好多人非議，經常向外亂咁講嘢，個頒獎禮又搞到一塌糊塗。
今年仲離譜，開製作會議時，中央台竟然有份列席，自己香港金像獎，點解內地電視台有份參與開會，唔怪得原本話請呢期唔多受內地歡迎嘅台灣籍導演李安嚟，到頭來又取消咗啦！
