一套全CG電影《FF：TheSpiritsWithin》，令SQUARE陷入財政危機，亦令《FF》靈魂人物坂口博信離開，加入微軟陣營。正當在慘敗之幾年間，SQUARE跟ENIX完成合併，再將皇牌《FFVII》以全CG電影重新推出，密謀收回失地。結果，是成功的；單單日本已賣過百萬隻、兩度參展威尼斯影展，更成今年香港國際電影節一分子，雖未能補償之前逾億美元之損失，但銷量同口碑已贏到開巷！
記者：徐影龍
背景複雜中文易消化
《天子降臨》港版3區DVD剛喺上周五晚登場，好多碟舖都用佢做Display，引嚟唔少途人駐足觀看，加上同期冇乜大片上場，所以銷售情況相當之理想。據旺角DVD舖Sales講番，好多機迷一直等3區碟推出，話晒故事背景都幾複雜吓，齋睇打鬥場面太過表面喇！3區碟由ERA代理，分單碟及雙碟版，單碟版係咁意加個輯錄PS版《FFVII》嘅畫面做回顧；雙碟版就好睇得多，11段刪除片段、製作特輯及《FFVII》復活計劃遊戲預覽等，對Fans如筆者嚟講，就唔慳嗰$32蚊啦！
華麗CG打得激
不過先旨聲明，《天子降臨》故事背景幾複雜吓，用好多概念去包裝一個環保意識，若然未玩過《FFVII》，基本上會睇得好亂。
古仔睇唔明唔緊要，就算單純地睇CG動畫，一樣令你滿意而歸！SQUAREENIX在CG製作上無疑提升到另一層次，不但人物膚色及衣服紋理像真度極高，連電影內打鬥場面都達到爽快亮麗，最難得係動作「似番個人」，好多遊戲機入面嘅精采意念都重現番，最為人津津樂道嘅首推決戰錫菲羅士及合戰龍王呢兩幕，就算唔識日文，都肯定睇到拍案叫絕！
Tifa真人靚爆鏡
睇雙碟版Bonus，最有印象者，唔係導演野村哲也嘅訪問，反而係「聲演」Tifa嘅伊藤步！你知啦，一般日本聲優（配音員）把聲係好靚，但通常見光死，你睇《櫻大戰》入面得個橫山智佐見得人就知。但伊藤步清秀得嚟好有少女氣息，直頭有溫柔版陳慧琳嘅感覺，佢肯企出幕前，肯定有運行！
11段刪除片段其實都好短，每段得十零秒，當中主要係戰鬥場面，全部都好型，睇得都幾High㗎。Making方面，落齊製作人員專訪，從中睇到㗎仔嘅製作好認真，文場、武鬥都用上真人預演一次，難怪動作表達得咁真。
《FFVII》威水史
儘管近年不斷受Fans抨擊，不過《FF》系列仍是全球最高銷量嘅RPG遊戲，《FFVII》更創下銷售934萬套嘅驚人數字（包括PS版、PC版及國際版）。猶記得當年世嘉Saturn同SONYPS之次世代火併，PS勝在播片夠靚，而Saturn就動作流暢取勝，兩者本來叮噹馬頭有得鍊，但一年後SQUARE喺PS上推出《FFVII》，遊戲及主機銷量即如洪水般暴升，將Saturn大幅拋離，自此SS便一蹶不振。一隻Game推冧一個遊戲王國，實在恐怖！
愈誇愈好睇
《天子降臨》擺脫《TheSpiritsWithin》那種貼近現實感，以超浮誇演繹故事及動作場面，俗語所謂聽古唔好駁古，誇得好睇，又何妨！
決戰最強召喚獸
奸角KADAJ召出最強召喚獸——龍王巴哈姆特，主角一行人力戰到底，個個恍如輕功高手跳嚟跳去，玩過《FFVII》嘅人一定好有Feel！
一飛衝天勁過神六
最終龍王飛上高空，發出最強必殺技，眾人輪流將古蘭特拋上高空，做成人肉發射器，主角直奔大氣層，一刀劈死龍王，氣勢仲勁過神舟六號升空！
六劍合一似蜀山
主角古蘭特架電單車，合計藏有六把神兵，全部都可因應戰況而合體及分離，尾場大戰錫菲羅士一幕，更學足《蜀山》咁馭劍飛行，使出遊戲中最終Limit技超究武神霸斬！
