郭家麒（KK）上星期發火鬧地政署，話佢哋專登阻撓佢想喺今個月卅號，喺添馬艦搞嘉年華會嘅申請，仲揚言話要搵孫公對質。
KK一番「口水攻勢」即時見效，地政署忽然好快手，喺上星期三就覆咗佢話申請冇問題，卅號任佢點搞都得。KK好高興咁話地政署應該都係怕咗佢會搵孫公算賬。
KK除咗會邀請煲呔做當日主禮嘉賓，亦會請孫公做論壇講者，孫公去好定唔去好呢？呢個問題都好頭痕㗎，好彩仲有幾日時間畀佢度吓點拆彈。
就算孫公唔去，嗰日添馬艦都應該會好熱鬧，事關KK已經諗緊嗰日要搞個活動破世界紀錄，可能係最多家庭成員一齊放風箏，又或者最多家庭成員一齊畫畫，𠵱家仲未諗掂數，但民航處已經畀咗批准書畀佢哋喺嗰度放風箏，有興趣放風箏者不妨喺嗰日到添馬艦一遊。
傳真︰2623-9278
電郵︰[email protected]